Solapur News : लिंगायत समाजाचे श्रद्धास्थान असलेल्या गुड्डापूर (ता. जत, जि.सांगली) येथील दानम्मा देवी मंदिर पाडण्यास पुरातत्व व वस्तुसंग्रहालय संचालनालयाने मनाई केली आहे. त्यामुळे नवे मंदिर बांधण्यासाठी ऐतिहासिक वारसा नष्ट करता येणार नाही.

गुड्डापुरात बाराव्या शतकात होऊन गेलेल्या दानम्मा देवी यांचे मंदिर आहे. मंदिर विश्वस्तांकडून तीर्थक्षेत्र विकास योजनेतून मिळालेल्या पाच कोटी निधीतून मंदिर परिसरात विकासकामे सुरू आहेत. ऐतिहासिक मंदिर पाडून तेथे नव्याने मंदिर बांधण्याचा घाट विश्वस्तांनी घातला आहे.

याविरोधात खानापूर (ता. दक्षिण सोलापूर) येथील भक्त विजयकुमार बिराजदार यांनी पुण्याच्या पुरातत्व व वस्तुसंग्रहालयाचे विभागीय संचालक यांच्यासह कोल्हापूरच्या सहायक धर्मादाय आयुक्त, सांगलीचे जिल्हाधिकारी यांच्याकडे केली होती. त्यावर पुरातत्व विभागाचे सहायक संचालक डॉ. विलास वाहणे यांनी मंगळवारी (ता. १९) मंदिर पाडण्याबत मनाई आदेश काढला आहे.

हे मंदिर प्राचीन असल्याने त्याचे मूळ स्वरूपानुरूप जतन होणे आवश्यक आहे. कोणत्याही कारणास्तव मंदिराचे पाडकाम सुरू असल्यास ते तत्काळ थांबवावे. मंदिरात कोणतेही फेरबदल व आधुनिक स्वरूपाचे काम करू नये. तसेच भविष्यात पुरातत्त्व विभागाच्या परवानगीशिवाय कोणत्याही प्रकारचे बांधकाम करू नये, असे त्यांनी आदेशात म्हटले आहे.

मंदिराचा काही भाग पाडून बांधकाम

श्री दानम्मा देवीला पुरणपोळीचा नैवेद्य दाखविला जातो. त्यासाठी या ऐतिहासिक मंदिराभोवती नैवेद्य बनविण्यासाठी ओवऱ्या होत्या. मंदिर समितीने त्या पाडून तेथे सिमेंट काँक्रीटचे बांधकाम केले आहे.