Government Approval : राज्य सरकारने राष्ट्रीय कृषि विकास योजनेच्या अंतर्गत मंजूर प्रकल्पांच्या अंमलबजावणीसाठी निधी वितरणाला मान्यता दिली आहे. राज्य सरकारने सर्वसाधारण प्रवर्गासह, अनुसूचित जाती, अनुसूचित जमातीतील पात्र शेतकऱ्यांसाठी १२० कोटी ३३ लाख रुपयांचा निधी वितरित करण्यासाठी शुक्रवारी (ता.२१) शासन निर्णय प्रसिद्ध केला आहे.

राष्ट्रीय कृषि विकास योजनेतंर्गत २०२४-२५ मध्ये नवीन प्रकल्पासाठी २९३ कोटी २९ लाख रुपयांच्या वार्षिक कृती आराखड्याला मंजूरी देण्यात आली होती. त्यापैकी यामध्ये प्रकल्प अहवालानुसार केंद्र सरकारने ७४ किती ७४ लाख रुपयांच्या निधीला मंजूरी दिली. त्याच समरूप राज्य सरकारने ४८ कोटी १३ लाख रुपयांच्या निधीला मंजूरी दिली.

शासन निर्णयानुसार यामध्ये सर्वसाधारण प्रवर्गासाठी ९८ कोटी २१ लाख रुपये, अनुसूचित जाती प्रवर्गासाठी १४ कोटी ७१ लाख रुपये आणि अनुसूचित जमाती प्रवर्गासाठी ७ कोटी ३९ लाख रूपयांचा निधी पात्र शेतकऱ्यांना वितरित करण्यात येणार आहे.

दरम्यान, या योजनेच्या अंतर्गत मृदा आरोग्य पत्रिका, सूक्ष्म सिंचन, पीक वैविध्य, कृषी स्टार्टअप निधी, प्रति थेंब अधिक पीक, पिक विविधीकरण, आणि सेंद्रिय शेती यासारख्या योजना राबवल्या जातात. त्यातून विविध घटकांसाठी शेतकऱ्यांना अनुदान दिलं जातं.