Akola News : जिल्ह्यातील सर्वांगीण विकासासाठी २०२४–२५ या आर्थिक वर्षातील ३७४ कोटी २१ लाख रुपयांच्या खर्चास जिल्हा नियोजन समितीच्या गुरुवारी (ता. ५) झालेल्या बैठकीत मंजुरी देण्यात आली. राज्याचे कामगार मंत्री तथा जिल्ह्याचे पालकमंत्री आकाश फुंडकर यांच्या अध्यक्षतेखाली नियोजन भवनात ही बैठक पार पडली.

यावेळी आमदार रणधीर सावरकर, प्रकाश भारसाकळे, हरीश पिंपळे, नितीन देशमुख, साजिद पठाण, वसंत खंडेलवाल, अमोल मिटकरी, किरण सरनाईक, जिल्हाधिकारी अजित कुंभार, जिल्हा पोलिस अधीक्षक अर्चित चांडक, प्रभारी जिल्हा परिषद मुख्य कार्यकारी अधिकारी मनोज जाधव, जिल्हा नियोजन अधिकारी राजेश सोनखासकर आदी मान्यवर उपस्थित होते.

यावेळी पालकमंत्री फुंडकर म्हणाले, की जिल्ह्यातील सर्व विभागांनी निधीचा योग्य वापर करीत नियोजनबद्ध आणि काटेकोर कामकाज करावे. प्रस्ताव वेळेत सादर करून प्रशासकीय आणि तांत्रिक मान्यता प्रक्रियेत विलंब टाळावा. त्यांनी पुढे सांगितले की, आगामी वर्षासाठी ४३७ कोटी ५१ लाख रुपयांचा नियतव्यय मंजूर असून, त्यानुसार कामांच्या मान्यताही लवकर पूर्ण कराव्यात.

शेतकऱ्यांच्या तक्रारींची गंभीर दखल

कृषी उत्पादनांचे लिकिंग, खोटे पंचनामे, व पीकविमा कंपन्यांच्या हलगर्जीपणावर कठोर कारवाईचे आदेश त्यांनी यावेळी दिले. एचडीएफसी एर्गो पीक विमा कंपनीविरोधात गुन्हा दाखल झाला असून, खोट्या पंचनाम्याची कागदपत्रे कृषी विभागाने पोलिसांकडे सुपूर्द करावीत.

जबाबदारांवर कठोर कारवाई झाली पाहिजे," असे त्यांनी स्पष्ट केले. खतांच्या तक्रारींचे त्वरित निवारण करावे, कोचिंग क्लासेससाठी फायर ऑडिट अनिवार्य करण्याची कार्यवाही व्हावी असे सांगत त्यांनी अनुपालन विषयक विविध बाबींवर आढावा घेतला.

विभागनिहाय मंजुरी

सर्वसाधारण योजना :

२७० कोटी ७७ लाख

अनुसूचित जाती उपयोजना :

८७ कोटी ९८ लाख

आदिवासी उपयोजना :

१५ कोटी ४५ लाख