Rajgurunagar News : ‘‘शासनामार्फत खेड तालुक्यात आदिवासी कातकरी समाजातील कुटुंबांसाठी पंतप्रधान जनमन घरकुल योजना राबविण्यात येत आहे. खेड तालुक्याला ३५३ घरांचे उद्दिष्ट देण्यात आले आहे. शासनपातळीवर जागा उपलब्ध होताच घरकुलांचा निधी देण्यात येईल,’’ अशी माहिती गटविकास अधिकारी विशाल शिंदे यांनी दिली.

केंद्र सरकारने कातकरी समाजासाठी पीएम जनमन कार्यक्रम सुरू केला आहे. खेड तालुक्यात आदिवासी कातकरी समाजातील कुटुंबांची संख्या जास्त आहे. वर्षानुवर्षे ही कुटुंबे झोपडीत राहत होती. त्यामुळे त्यांचा सर्वांगीण विकास होत नव्हता. शिवाय, त्यांना जातीचे दाखले मिळत नसल्याने त्यांच्या मुलांच्या माध्यमिक व उच्च शिक्षणाला खीळ बसला आहे.

जागेअभावी योजनेचे उद्दिष्ट साध्य करण्यास खेड पंचायत समितीला अडचण येत आहे. मात्र सरकारने यावर पर्याय म्हणून ज्या कुटुंबाला घरकुलासाठी जागा नाही, त्यांना ती देण्यासाठी जागेचे पैसे शासन देणार आहे. यासाठी शासन आणि ग्रामपंचायत पातळीवर प्रयत्न सुरू आहेत. काही गावांचे सर्वेक्षण केले गेले आहे. जागा देण्याच्या हालचाली सुरू झाल्या आहेत. ओबीसी आणि एनटी प्रवर्गातील कुटुंबांना घरकुल मिळेल. त्याबाबत लाभार्थींची नवीन यादी तयार करण्याचे काम सुरू आहे, अशी माहिती विस्तार अधिकारी अनिता ससाणे यांनी दिली.

घरांसाठी मिळणारी रक्कम...

- घरकुल बांधण्यासाठी २ लाख रुपये मिळणार

- जागा घेण्यासाठी १ लाखाची तरतूद

- घर बांधताना ९० दिवसांसाठी २९५ रुपये प्रतिदिन मजुरी

- शौचालय बांधण्यासाठी १२ हजार रुपये मिळणार