Sangli News : विस्तारित म्हैसाळ सिंचन योजनेच्या दुसऱ्या टप्प्यातील कामांच्या निविदा काढून कामे सुरू करा जत तालुक्यातील विविध संघटनांच्या वतीने १९ फेब्रुवारीाला नगर ते विजयपूर महामार्गावर रास्ता रोको आंदोलन करण्यात येणार आहे, अशी माहिती तालुका पाणी संघर्ष समितीचे अध्यक्ष सुनील पोतदार यांनी दिली.

विस्तारित म्हैशाळ सिंचन योजनेच्या पहिल्या टप्प्यातील कामाला सुधारित प्रशासकीय मान्यता देऊन ९८१ कोटींची निविदा काढून कामे सुरू केली आहेत. कामे गतीने सुरू आहेत. मात्र ६५ गावांच्या दुसऱ्या टप्प्यातील कामांचा अद्याप सर्व्हे झाला नाही. या कामांना सुधारित प्रशासकीय मान्यता नाही. निविदा प्रक्रिया नाही.

जत तालुक्यातील सर्वपक्षीय बैठकीत ६५ गावांतील विस्तारित सिंचन योजनेच्या कामांचा सर्व्हे करून तत्काळ निविदा काढून कामे सुरू करावीत यासाठी जत प्रांताधिकारी कार्यालयासमोर आंदोलन करण्यात आले.

या वेळी १९ फेब्रुवारी रोजी उमदी, मुचंडी, डफळापूर, संख, शेगाव आदी ठिकाणी रास्ता रोको आंदोलनाचा निर्णय घेण्यात आला आहे. नगर ते विजयपूर बसस्थानक महामार्गावर रास्ता रोको आंदोलन करण्यात येणार आहे. समितीचे उपाध्यक्ष अनिल शिंदे, निवृत्ती शिंदे, महंमद कलाल, चिदानंद संख, सिद्र्या शिंदे, गोपाल माळी, केशव पाटील, श्रीमंत परगोंड, अरविंद मुंगळे, तानाजी मोरे, दत्ता भोसले उपस्थित होते.