Nashik News : शिंदे सरकारमधील मंत्री दादा भुसे यांचे प्रतिस्पर्धी असलेले शिवसेना (ठाकरे) उपनेते अद्वय हिरे यांना आज नाशिक ग्रामीण पोलिसांच्या स्थानिक गुन्हे पथकाने आज भोपाळमधून (मध्यप्रदेश) अटक केली.

डॉ अद्वय हिरे यांच्यावर रेणुका सुत गिरीसाठी नाशिक जिल्हा बँकेकडून घेतलेल्या कर्जाची परतफेड न केल्याने फसवणुकीचा गुन्हा दाखल करण्यात आला होता. त्यांनी जामीनासाठी अर्ज केला होता, पण न्यायालयाने तो नाकारल्याने गेल्या दोन आठवड्यांपासून हिरे फरार झाले होते.

शिवसेना ठाकरे गटाचे उपनेते अद्वय हिरे यांनी ८ वर्षांपूर्वी रेणुका सुतगिरणीसाठी नाशिक जिल्हा मध्यवर्ती बँकेतून (NDCC Bank) ७.४६ कोटीचे कर्ज घेतले होते. त्याची वेळेत परतफेड न केल्याने ही रक्कम ३२ कोटी रुपयांवर गेली होती. याप्रकरणी मालेगाव तालुक्यातील रमझानपुरा पोलीस ठाण्यात कर्जाच्या पैशांचा गैरवापर करत फसवणूक केल्याचा गुन्हा दाखल करण्यात आला.

त्यानंतर हिरे यांनी उच्च न्यायालयात धाव घेतली. परंतु त्याचा जामीन नाकारण्यात आल्याने त्यांच्या अडचणीत वाढ झाली. ते काही दिवसांपासून फरार होते. नाशिक ग्रामीण पोलीस त्यांचा शोध घेत होते. आज त्यांना स्थानिक गुन्हे शाखेने भोपाळमधून अटक केली. या गुन्ह्यामध्ये हिरे यांच्यासह १२ जणांविरोधात फसवणूकीचा आरोप करण्यात आला आहे.