Palghar Zilla Parishad Bharti Update : पालघर जिल्हा परिषदेच्या (Palghar Zilla Parishad) आरोग्य विभागामध्ये कंत्राटी पद्धतीने कर्मचाऱ्यांची भरती प्रक्रिया सुरू आहे. या भरती प्रक्रियेत गैरव्यवहार सुरू असल्याची बाब समोर आलेली आहे.

उमेदवाराकडून नियुक्तीपत्र देताना व मुलाखतीदरम्यान २५ हजार रुपयांची मागणी केली जात असल्याचे निदर्शनास आले होते.

जिल्हा परिषदेचे अध्यक्ष प्रकाश निकम यांना ही माहिती समजल्यानंतर भरतीदरम्यान गैरव्यवहार केला असल्यास संबंधितावर त्वरित कारवाई करण्यात येईल व भरतीचा ठेका रद्द केला जाईल, असा स्पष्ट इशारा देण्यात आला.

आरोग्य विभागामध्ये ५०० कंत्राटी कर्मचाऱ्यांची पदे मंजूर झाली आहेत. ही भरती करताना ज्या उमेदवाराकडे पैशाची मागणी केली असेल, त्या उमेदवाराने निनावी पत्र किंवा फोन केला तरीदेखील संबंधित अधिकारी अथवा कर्मचाऱ्यावर कारवाई करण्यात येणार आहे.

तसेच ठेकेदाराचा ठेका रद्द केला जाईल, असे ठणकावून सांगितले. ज्या पदाधिकाऱ्यांच्या स्वीय सहायकाने अथवा कोणाही अधिकारी किंवा पदाधिकाऱ्याने अशा प्रकारची मागणी केल्यास उमेदवार निनावी पत्र किंवा फोनद्वारे कळवू शकतात, असे आवाहन जि.प. अध्यक्षांनी केले.