Washim News : यंदाच्या खरीप हंगामापासून प्रमाणित व सत्यतादर्शक बियाण्यांची विक्री, वितरण हे ‘साथी पोर्टल’द्वारे करणे शासनाने बंधनकारक केले आहे. शासन निर्णयानुसार, बियाणे विक्रेत्यांनी व बियाणे कंपन्यांनी विक्रीसाठी साथी पोर्टलचा वापर करणे आवश्यक आहे.

या पार्श्वभूमीवर कृषी विभागाने वेळोवेळी प्रशिक्षण सत्रांचे आयोजन केले होते. हा नियमभंग करणाऱ्या ४३ बियाणे व १५ खत विक्रेत्यांना कारणे दाखवा नोटिसी बजावल्याने खळबळ उडाली आहे.

जिल्ह्यात कृषी विकास अधिकाऱ्यांनी तालुका व जिल्हा स्तरावर एकूण ८ प्रशिक्षण कार्यक्रम घेतले होते. तरीही काही बियाणे विक्रेत्यांनी साथी पोर्टलचा वापर न करता बियाण्यांची विक्री केल्याचे आढळून आले.

अनुदानित खते ‘एफएमएस’ प्रणालीद्वारे शेतकऱ्यांच्या आधार क्रमांकाच्या आधारे विक्री करणे बंधनकारक आहे. मात्र प्रत्यक्ष साठा व ऑनलाइन दाखविलेला साठा यामध्ये तफावत आढळल्यामुळे केंद्र शासनाकडून पुढील खत साठा मिळण्यात अडथळे निर्माण होण्याची शक्यता निर्माण झाली आहे.

सर्व विक्रेत्यांना २ दिवसांच्या आत खुलासा सादर करण्यास सांगण्यात आले असून खुलासा समाधानकारक न आढळल्यास संबंधितांचा परवाना निलंबित किंवा रद्द करण्याची कारवाई केली जाईल, असा इशारा कृषी विभागाने दिला आहे.

बियाणे वितरण व्यवस्थेमध्ये पारदर्शकता, बनावट/कालबाह्य बियाण्यांवर नियंत्रण, उत्पादन कंपन्या, वितरक व विक्रेत्यांमध्ये समन्वय तसेच परराज्यांतून येणाऱ्या बियाण्यांवर देखरेख हा साथी पोर्टलचा उद्देश आहे.

शासनाच्या ध्येयधोरणानुसार शेतकऱ्यांना दर्जेदार खते व बियाणे मिळण्यासाठी सर्व परवानाधारक विक्रेत्यांनी ई-पॉस प्रणाली तसेच साथी पोर्टलवरील डेटा अद्ययावत ठेवणे अत्यावश्यक असल्याचे कृषी विभागाने म्हटले आहे.