Akola News : सततच्या पावसाने यंदाच्या हंगामातील सोयाबीन बऱ्याच ठिकाणी पिवळे पडत असून उत्पादन कमी होण्याची शक्यता वाढत आहे. तर दुसरीकडे डीओसीचे फ्यूचर सौदे थोडे तेजीत आल्याने बाजार पेठांमध्ये सोयाबीनच्या दरात २०० रुपयांपर्यंत दरवाढ झाल्याचे सांगितले जात आहे. येथील बाजार समितीत सोयाबीन सरासरी ४३२५ रुपये दरांनी विक्री होत आहे.

गेले काही दिवस दरवाढीच्या मुद्यावर सोयाबीन उत्पादक पट्ट्यात समाज माध्यमातून लोकचळवळ उभारली जात आहे. सोयाबीनला किमान ६ हजारांचा दर हा शेतकऱ्यांचा हक्क असल्याची जनजागृती केली जात आहे. अशातच बाजारात आता सोयाबीनच्या दरात थोडी दरवाढ होऊ लागली आहे.

येथे सोयाबीन किमान ३७४५ व कमाल ४४१५ रुपयांपर्यंत विकली. सरासरी ४३२५ रुपयांचा दर मिळाला. बाजारात सोयाबीनची आवक १८६० क्विंटलपर्यंत झाली. यंदा सततच्या पावसाने सोयाबीन पिकाचे नुकसान होण्याची शक्यता वाढू लागली आहे. नवीन सोयाबीनची आवक किमान २ महिन्यांनी होईल, अशी शक्यता आहे.

त्यामुळे डीओसीच्या फ्यूचर सौद्यात थोडी तेजी आली आहे. त्याचे परिणाम बाजारातील सोयाबीन खरेदीवर झाली असे जाणकार सांगत आहेत. बाजारात गेल्या काही दिवसांत सोयाबीनचे दर घटल्याने शेतकरी चिंतातुर झाले होते. सोयाबीनचा दर अवघा चार हजारांपर्यंत घसरला होता. वास्तविक सोयाबीनला शासनाने ४८९२ रुपये आधारभूत किंमत जाहीर झालेली होती. मात्र, हा दर सोयाबीनला मिळत नव्हता. आता आगामी हंगामाच्या तोंडावर थोडीफार दरवाढ झालेली आहे. ही दरवाढ किती दिवस टिकेल, या बाबत बाजारातील जाणकार साशंकता व्यक्त करीत आहेत.

आवक कमी झाली

सोयाबीनची आवक सध्या कमी झालेली आहे. अनेक बाजारांमध्ये जेमतेम आवक सुरू आहे. अकोल्यात दीड ते दोन हजार क्विंटलपर्यंत होत आहे. यापूर्वी ही आवक अधिक व्हायची.