Sangamner News : वादळी पावसासह धुक्याचा परिणाम कांदा पिकावर झाल्याने संतप्त झालेल्या आंबीखालसा (ता. संगमनेर) येथील संपत मारुती भुजबळ या शेतकऱ्याने एक एकर कांद्यावर थेट रोटाव्हेटर फिरवला आहे. त्यामुळे झालेला खर्चही अंगलट आला आहे.

संगमनेर तालुक्यातील आंबीखालसा गावांतर्गत असलेल्या पानसवाडी येथे संपत भुजबळ हे शेतकरी राहात आहेत. कांद्याला चांगले बाजारभाव मिळतील म्हणून त्यांनी एक महिन्यापूर्वी एक एकर क्षेत्रात गावठी कांद्याची लागवड केली होती.

सुरुवातीला कांद्याचे पीकही जोमात होते. मात्र, त्यानंतर झालेल्या अवकाळी पावसाने कांद्याचे पीक चांगलेच झोडपून काढले. त्यातच पुन्हा ढगाळ वातावरणाचा फटकाही कांद्याला बसला असून शेंडे पिवळे पडून थेट पिळकावणे पडले आहे. त्यामुळे कांदे ठेवूनही त्यात काही सुधारणा होत नव्हती म्हणून संतप्त झालेल्या भुजबळ या शेतकऱ्याने कांदा पिकावर रोटाव्हेटर फिरवला आहे.

एक एकर कांद्यासाठी झालेला खर्चही फिटला नाही. त्यामुळे भुजबळ यांच्यावर डोक्यालाच हात लावण्याची वेळ आली आहे. आधीच शेतीमालाला बाजारभाव नाही. पावसाअभावी खरीप हंगामही वाया गेला असल्याने शेतकरी संकटात आहे. त्यातच आता तालुक्यात गेल्या काही दिवसांपासून सातत्याने हवामानात बदल होत आहे.

सुरुवातीला ढगाळ वातावरणाचे संकट होते. त्यातच पुन्हा दोन ते दिवसांपासून धुक्याचे संकट ओढावले आहे. सर्वत्र धुकेच धुके पहावयास मिळत आहे. त्यामुळे याचा फटका थेट कांदा, गहू, हरभरा, टोमॅटो या पिकांसह डाळिंब, द्राक्ष आदी फळबागांनाही बसला आहे. वीस दिवसांपूर्वी एक एकर क्षेत्रात गावठी कांद्याची लागवड केली होती.

त्यासाठी जवळपास पंधरा ते वीस हजार रुपयांचा खर्च आला होता. मात्र, अवकाळी पावसासह धुक्याने कांद्याला पिळकावणे पडले आहे. त्यामुळे एक एकर कांद्यावर थेट रोटाव्हेटर मारला आहे असे शेतकरी संपत भुजवळ यांनी सांगितले.