Sindhudurg News : राज्य शासन आणि जिल्हा परिषद पशुसंवर्धन विभागामध्ये एकूण मंजूर असलेल्या २११ पैकी तब्बल ८७ पदे गेल्या काही वर्षांपासून रिक्त आहेत. त्यामध्ये अधिकाऱ्यांची पदे रिक्त असल्यामुळे पशुपालकांची मोठी गैरसोय होत आहे.

जिल्ह्यात राज्य पशुसंवर्धन विभाग आणि जिल्हा परिषद पशुसंवर्धन विभाग कार्यरत आहेत. या दोन्ही विभागांमध्ये जिल्हा सहायक आयुक्त, पशुधन विकास अधिकारी, सहायक पशुधन विकास अधिकारी, पशुधन पर्यवेक्षक, जिल्हा पशुसंवर्धन अधिकारी आणि इतर अशी एकूण २११ पदे मंजूर आहेत. परंतु गेल्या काही वर्षांपासून यापैकी अनेक पदे रिक्त असून त्यामुळे रुग्णांची गैरसोय होत आहे.

सद्यःस्थितीत दोनही विभागांतील तब्बल ८७ पदे रिक्त आहेत. त्याचा मोठा परिणाम जिल्ह्याच्या पशुपालनावर होताना दिसत आहे. लम्पी स्कीन हा त्वचाआजार आटोक्यात आणताना असलेल्या अतिरिक्त अधिकारी आणि कर्मचाऱ्यांवर ताण आला होता.

जिल्ह्यात गायई, म्हशी, शेळ्या, डुकरे मिळून १ लाख ८८ हजार ९९ पशुधन आहे. या प्राण्यांवर उपचार करण्यासाठी असलेल्या अधिकाऱ्यांना तारेवरची कसरत करावी लागत आहे. अधिकाऱ्यांची पदे रिक्त असल्यामुळे मोठ्या समस्येला पशुपालकांना सामोरे जावे लागत आहे.