Parbhani News : परभणी जिल्ह्यातील तापमानात वाढ झाली आहे. बाष्पीभवनाचा वेग वाढला आहे. परिणामी, ब्रह्मवाकडी (ता. सेलू) येथील निम्न दुधना प्रकल्पामधील उपयुक्त पाणीसाठा १० टक्क्यांच्या खाली गेला आहे.

बुधवारी (ता. २७) सकाळी ६ वाजता या प्रकल्पात २०.००६ दलघमी म्हणजेच ८.२६ टक्के जिवंत पाणीसाठा शिल्लक राहिला होता.गतवर्षीच्या (२०२३) पावसाळ्यात धरणक्षेत्रातील अल्प पर्जन्यमानामुळे निम्न दुधना प्रकल्पाचे धरण भरले नाही.

निम्म दुधना धरणाचा प्रकल्पीय जिवंत साठा २४२.२०० द. ल. घ. मी आहे. यंदाच्या १ जून रोजी या धरणामध्ये ७७.४३१ दलघमी (३१.९७ टक्के) जिवंत पाणीसाठा होता. धरण क्षेत्रात १ जून २०२३ पासून एकूण ५९१ मिलिमीटर पाऊस झाला. त्याआधीच्या वर्षी ७८५ मिलिमीटर पाऊस झाला होता. १ जून पासून एकूण २४.९०७ दलघमी पाण्याचा येवा झाला.

या धरणात बुधवारी (ता. २७) सकाळी ६ वाजता २०.००६ दलघमी म्हणजेच ८.२६ टक्के जिवंत पाणीसाठा होता. गतवर्षी (२०२३) ता. २७ मार्च रोजी या धरणात ११२.८११ दलघमी म्हणजेच ४६.५८ टक्के जिवंत पाणीसाठा होता.

बाष्पीभवन व इतर मिळून प्रतिदिन ६.७४ एमएमक्यूब व्यय होत आहे. तसेच बिगर सिंचन पाणी वापर ०.०३१० दलघमी आहे. त्यामुळे या धरणातील पाणीसाठ्यात घट होत आहे. येत्या काळात या धरणांवर अवलंबून असलेल्या गावात पाणीटंचाईची समस्या गंभीर होऊ शकते.