Sangli News : सांगली जिल्ह्यात २०२३ च्या खरीप हंगामात कापूस, सोयाबीन पिकाची लागवड करून ई-पीकपाहणी केलेल्या शेतकऱ्यांना अर्थसाह्य योजनेतून ६ कोटी १७ लाख रुपयांची आर्थिक मदत त्यांच्या नावावर जमा झाली आहे. जिल्ह्यातील ३१ हजार शेतकऱ्यांना याचा लाभ मिळाला आहे.

सोयाबीन व कापूस पिकास एका हेक्टरपर्यंत पाच हजार रुपयांचे अर्थसाह्य मिळणार, अशी घोषणा यापूर्वीच सरकारने केली होती. २०२३ च्या खरीप हंगामात सोयाबीन व कापूस उत्पादकांचे मोठे नुकसान झाले होते. हेक्टरी पाच हजार रुपये मदत देण्याचा निर्णय झाला होता.

खरीप हंगामात २०२३ मध्ये कापूस व सोयाबीन पीक लागवड करून त्याची ई-पीकपाहणी ऑनलान केलेल्या शेतकऱ्यांना शासनाने अर्थसाह्य योजनेतून पाच हजार रुपयांपर्यंत अनुदान देण्याचा निर्णय घेतला. एक हेक्टर कापूस पिकाला पाच हजार, तर एक हेक्टर सोयाबीन पिकाला पाच हजार असे अनुदान निश्वित करण्यात आले. अर्थसाह्य योजनेत शेतकऱ्यांना लाभ देण्यासाठी ११ ऑगस्टपासून प्रत्येक गावात कृषी सहायकांनी योजनेची यादी लावली आहे.

कापूस व सोयाबीन उत्पादक शेतकऱ्यांना अर्थसाह्य योजनेचा लाभ देण्यासाठी त्यांचा कुठलाही खर्च होणार नाही, याची दक्षता शासनाने या योजनेत घेतली होती. गावात लावलेल्या यादीत नाव असल्यास केवळ आधार कार्डची झेरॉक्स व शासनाने निर्धारित केलेले प्रतिज्ञापत्र शेतकऱ्यांनी भरून कृषी सहायकांकडे देण्यात आले होते.

गावात लावलेल्या यादीत आपले नाव असल्यास शेतकऱ्यांनी केवळ आधार कार्डची झेरॉक्स व प्रतिज्ञापत्र उपलब्ध करून दिलेल्या फॉर्मवर लाभार्थी शेतकऱ्याचे नाव, कापूस व सोयाबीन पिकाचे क्षेत्र व स्वाक्षरी करून देण्यात आली.