Akola News : शेतकऱ्यांना पारंपरिक पिकांच्या चाकोरीतून बाहेर काढण्याच्या उद्देशाने तसेच उत्पन्न वाढीसाठी राज्यात बांबू लागवडीला प्रोत्साहन दिले जात आहे. यासाठी पुढे आलेल्या शेतकऱ्यांचे ‘नरेगा’च्या पोर्टलवर ५ लाखांवरील रकमेचे अर्ज अपलोड होत नसल्याने हे शेतकरी गेल्या काही दिवसांपासून चिंतातुर झाले आहेत.

या योजनेला सात लाखांचे पाठबळ दिले जाणार असताना तेवढ्या रकमेचे अर्ज न घेण्याचे कारण समजत नसल्याने अनुदानावरून गोंधळाची स्थिती बनण्याची चिन्हे आहेत.

राज्यात मुख्यमंत्री मिशन बांबू -हरित महाराष्ट्र कार्यक्रम राबविला जात आहे. या कार्यक्रमाच्या माध्यमातून पहिल्या वर्षी एक लाख (तीन वर्षांत ५.२५ लाख) हेक्टरवर बांबू लागवडीचे उद्दिष्ट दिल्या गेले आहे. यासाठी महात्मा गांधी राष्ट्रीय ग्रामीण रोजगार हमी योजनेअंतर्गत बांबू लागवडीचा कार्यक्रम आखण्यात आला.

शेतकऱ्यांना हेक्टरी ७ लाख ४ हजार रुपये अर्थसाह्य मिळणार आहे. यात सहभागी होणाऱ्या शेतकऱ्यांचे आधीच काही ठिकाणी प्रशिक्षणसुद्धा घेण्यात आले. यामध्ये बांबूचे महत्त्व, जाती, व्यवस्थापन अशा विविध बाबींचे मार्गदर्शन देत शेतकरी प्रशिक्षित करण्यात आला. आता शेतकऱ्यांनी यानुसार बांबू लागवडीसाठी अंदाजपत्रक तयार केले आहेत.