Tuljapur News : तुळजापुर तालुक्यातील ३४ साठवण तलाव, १७ लघु पाटबंधारे प्रकल्प मृत साठ्याखाली आहेत. सहा लघुपाटबंधारे प्रकल्पात काहीच पाणी शिल्लक नाही. मार्च, एप्रिल, मे तसेच अर्धा जून महिना बाकी आहे. तर उन्हाळ्याच्या झळा आत्तापासून बसण्यास सुरवात झाली आहे.

यंदाच्या पावसाळ्यात मोठ्या प्रमाणावर पावसाने उघडीप दिली. त्याचा मोठा फटका यंदा उन्हाळ्यामध्ये सर्व प्रकल्पांना बसलेला दिसून येत आहे. तलावात पाणीसाठा शिल्लक नाही. तालुक्यातील विविध साठवण तलावात, लघुपाटबंधारे प्रकल्पात पाणीसाठा शिल्लक नाही. त्यामुळे ग्रामीण भागातील शेतकऱ्यांना तलावातच पाणीसाठा शिल्लक नसल्याने वेगवेगळ्या उद्धभवातील पाणी कमी झाल्याचे शेतकरी सांगत आहेत.

शेतकऱ्यांच्या पशुधनास तलाव, लघुपाटबंधारे प्रकल्पातील पाणी शिल्लक नसल्याने मोठा फटका बसत आहे. तालुक्यात सावरगाव, सांगवी, माळुंब्रा, पिंपळा, पळस निलेगाव, अपसिंगा, हारणी (काटगाव), या तलावामध्ये ४. ६३७ दशलक्ष घनमीटर पाणीसाठा बुधवार ( ता. २८) पर्यंत उपलब्ध आहे, अशी माहिती पाटबंधारे विभागाकडून मिळाली आहे.

मृत पाणी साठ्याखालीलच पाणी सध्या उपलब्ध आहे. अजून तीन महिन्याच्या कालावधीतील प्रखर उन्हाळा येणे बाकी आहे. जूनपासून होणाऱ्या पावसाळ्यातच पाणीसाठा उपलब्ध होण्यास सुरवात होईल. तालुक्यातील रामधरा, नळदुर्ग मधील बॅरेज क्रमांक एक व दोन येथे पाणीसाठा आहे.

पाटबंधारे प्रकल्प कोरडे

तालुक्यातील मंगरूळ, काटी , दहिवडी, कदमवाडी, केमवाडी, आरळी खुर्द येथील लघुपाटबंधारे प्रकल्प पुण॔तः कोरडे आहेत.