Sugarcane Season Kolhapur Sangli : कोल्हापूर विभागात ३० साखर कारखान्यांनी हंगाम सुरू केला आहे. यामध्ये एकूण ऊस गाळप साडेपाच लाख टन झाले असून, ५ लाख ६० हजार क्विंटल साखरेचे उत्पादन मिळाले आहे. साखर उतारा ८.७० टक्के राहिला आहे. निवडणुकीमुळे १५ दिवस हंगाम पुढे गेला असला तरी विधानसभेची निवडणूक झाल्यानंतर तोडणी वाहतूकदार व शेतकऱ्यांच्यात ऊस तोडणीच्या कामाला गती मिळाली आहे.

कोल्हापूर विभागात ४० साखर कारखाने असून, ३० कारखान्यांनी हंगाम सुरू केला आहे. यंदा पाऊस लांबल्यामुळे उसाची वाढ खुंटली. मात्र, पाऊस थांबल्यानंतर थंडीमुळे उताऱ्यात वाढ होणार आहे. कोल्हापूर जिल्ह्यात साखर कारखान्यांकडे एकूण १ लाख ४० हजार हेक्टर, तर सांगली जिल्ह्यात एक लाख ३७ हजार हेक्टर उसाच्या नोंदी झाल्या आहेत.

निवडणुका संपताच कोल्हापूर जिल्ह्यात १५ साखर कारखान्यांनी तर सांगली जिल्ह्यात १५ साखर कारखान्यांनी हंगाम सुरू केला आहे. कोल्हापूर आणि सांगली जिल्ह्यात मिळून ८० हजार ऊस तोडणी मजूर बाहेरील जिल्ह्यातून येतात. यापैकी सुमारे ७० हजार मजूर दाखल झाले आहेत. कारखाने हंगाम उशिरा सुरू झाल्याने काही कामगार कर्नाटक व इतर राज्यात गेले आहेत. तर स्थानिकचे ५० हजार कामगार असल्याची माहिती साखर सहसंचालक विभागाकडून देण्यात आली.याचबरोबर यंदा यंत्राद्वारे ऊस तोडणी चांगली होईल, असे चित्र आहे.

कोल्हापूर जिल्ह्यात सुरू झालेले कारखाने

सहकारी कारखाने : आजरा शेतकरी, तात्यासाहेब कोरे वारणा, डॉ. डी. वाय. पाटील, जवाहर, छत्रपती राजाराम, शाहू, भोगावती, कुंभी कारखाना. खासगी कारखाने : ओलम अॅग्री, दालमिया भारत पन्हाळा, संताजी घोरपडे शुगर, दौलत इको केन, अथणी शुगर शाहूवाडी, अथणी शुगर भुदरगड.

सांगली जिल्ह्यात सुरू झालेले कारखाने

सहकारी कारखाने : क्रांती कुंडल, राजारामबापू युनिट ४, हुतात्मा किसन अहिर, सोनहिरा, मोहनराव शिंदे, क्रांती कुंडल, विश्वासराव नाईक.

खासगी कारखाने : सद्‌गुरू श्री श्री, दत्त इंडिया, रायगाव शुगर, यशवंत शुगर, श्रीपती शुगर, उदगिरी शुगर, यशवंत शुगर, दालमिया निनाई शुगर.