Nande News : विनापरवाना कीटकनाशके विक्री करणाऱ्या विरोधात कृषी विभागाच्या भरारी पथकाद्वारे केलेल्या कारवाईत कंपनीसह तिघांविरोधात नांदेड ग्रामीण पोलिस ठाण्यात शनिवारी (ता. २) गुन्हा दाखल केला आहे. या प्रकरणी १९ लाखांचा मुद्देमाल जप्त करण्यात आल्याची माहिती कृषी विकास अधिकारी तथा जिल्हास्तरीय पथक प्रमुख डॉ. नीलकुमार एतवडे यांनी दिली.

नांदेड जिल्ह्यात दरवर्षी खरीप हंगामात पिकांच्या फवारणीच्यावेळी काही कंपन्या बनावट कृषी निविष्ठा शेतकऱ्यांच्या माथी मारतात. यात शेतकऱ्यांची मोठी फसवणूक या कंपन्यांसह कृषी निविष्ठा विक्रेते राजरोसपणे करत असल्याचे दिसून येते. बनावट कृषी निविष्ठा विक्री करणारी ही चेन काहीवेळा यंत्रणेलाही हाताशी धरणल्याचे उघड झाले आहे.

गिरनार कारगो एस्कार्ट वाजेगाव (ता. जि. नांदेड) येथे गुजरात राज्यातील एव्हलोन क्रॉप सायन्स प्रायव्हेट लिमिटेड व श्रीनय अॅग्रो बायोटेक, छत्रपती संभाजीनगर या दोन कंपनीचे विनापरवाना बनावट कीटकनाशक विक्रीसाठी आल्याची गोपनीय माहिती पथक प्रमुख डॉ. नीलकुमार एतवडे यांना मिळाली.

यानंतर जिल्हा अधीक्षक कृषी अधिकारी दत्तकुमार कळसाईत, लातूर विभागीय गुणनियंत्रण विभागाचे तंत्र अधिकारी बालाजी मुंढे यांच्या मार्गदर्शनाखाली जिल्हास्तरीय भरारी पथक प्रमुख कृषी विकास अधिकारी डॉ. निलकुमार एतवडे, मोहीम अधिकारी सचिन कपाळे, जिल्हा गुण नियंत्रण निरिक्षक अमोल पेकम यांच्या उपस्थितीत नांदेड तालुका कृषी अधिकारी कार्यालयातील कृषी अधिकारी (गुण नियंत्रण) पुनम चातरमल यांनी धाड टाकली, या ठिकाणाहून बनावट कीटकनाशकाचा एकोणीस लाख तीन हजारांचा मुद्देमाल जप्त करून नांदेड ग्रामीण पोलिस ठाण्याच्या ताब्यात देण्यात आलेला आहे.

या प्रकरणी पुनम चातरमल यांच्या फिर्यादीवरून गुजरात राज्यातील एव्हलोन क्रॉप सायन्स प्रायव्हेट लिमिटेड व श्रीनय अॅग्रो बायोटेक, छत्रपती संभाजीनगर या कंपनीसह जांभळेनगर नायगाव येथील केलास रामचंद्र मुंगडे, डोणगाव (ता. बिलोली) येथील मारोती भीमराव मुनके, कुंचेली (ता. नायगाव) येथील राजेंद्र अशोकराव भुरे यांच्याविरुध्द विविध कलमान्वये गुन्हा दाखल करण्यात आला आहे.

जिल्ह्यात बनावट कृषी निविष्ठा सुळसुळाट

नांदेड जिल्ह्यात मागील अनेक वर्षापासून बनावट कृषी निविष्ठांची मोठ्या प्रमाणात विक्री होत असल्याच्या तक्रारी आहेत. नांदेड जिल्ह्यातील कृष्णुर एमआयडीसी व नांदेड एमआयडीसी परिसरात जैविक कीडनाशक, बुरशीनाशक, जैविक उत्तेजके (बायोस्टुमलंट) अप्रमाणीत बनविणाऱ्या कंपन्याही मोठ्या प्रमाणात उत्पादन करीत आपले उखळ पांठरे करत आहेत. यात दरवर्षी शेतकऱ्यांना करोडो रुपयांचा फटका बसत आहे. परंतु याकडे मात्र यंत्रणा फारसे गांर्भीयाने पाहताना दिसत नाही.