Irrigation Scheme: राज्य सरकार राष्ट्रीय कृषि विकास योजनेच्या अंतर्गत प्रति थेंब अधिक पीक योजनेतील सर्वसाधारण प्रवर्गाचा १५२ कोटी १४ कोटी रुपयांचा निधी कृषी आयुक्तांकडे वितरणासाठी मंजूर केला. त्यामुळे राज्यातील शेतकऱ्यांना २०२४-२५ मधील ठिबक आणि तुषार सिंचनाचा निधी मिळण्याचा मार्ग मोकळा झाला आहे. राज्य सरकारने या संदर्भातील शासन निर्णय शुक्रवारी (ता.२१) प्रसिद्ध केला आहे.

प्रति थेंब अधिक पीक या योजनेतून सूक्ष्म सिंचन घटकातून शेतकऱ्यांना ठिबक आणि तुषार सिंचनासाठी लाभ दिला जातो. त्यासाठी केंद्र सरकार ६० टक्के आणि राज्य सरकार ४० टक्के निधीचा हिस्सा देते. त्यानुसार १६ मे २०२४ च्या शासन निर्णयानुसार सूक्ष्म सिंचन घटकासाठी ६६७ कोटी ५० लाख रुपयांच्या निधीला प्रशासकीय मान्यता देण्यात आली होती.

या योजनेसाठी केंद्र सरकारचा ४०७ कोटी रुपयांचा हिस्सा होता. तर राज्य सरकारचा २७१ कोटी ३३ लाख रुपयांचा हिस्सा होता. यामधील १५२ कोटी १४ लाख रुपयांचा निधी सर्वसाधारण प्रवर्गातील लाभार्थी शेतकऱ्यांना वितरित करण्यासाठी राज्य सकरने मान्यता दिली आहे.

राज्यातील विविध जिल्ह्यातील शेतकऱ्यांचं सूक्ष्म सिंचन अनुदान मागील वर्षभरापासून प्रलंबित आहे. परंतु शेतकऱ्यांनी सिंचन संच खरेदी करूनही लाभ वेळेवर न मिळाल्याने कोंडी झालेली आहे. तसेच मागील दोन वर्षांचे अनुदान विविध जिल्ह्यातील शेतकऱ्यांना प्राप्त झाले नसल्याचे शेतकरी सांगतात. त्यासाठी शेतकऱ्यांनी आंदोलन आणि मोर्चा काढून सरकारच्या या प्रश्नाकडे लक्ष वेधले.

दरम्यान, केंद्र सरकार विविध योजनांचा निधी राज्य सरकारला वेळेवर देत नाही, त्यामुळे शेतकऱ्यांचं सिंचन अनुदान प्रलंबित असल्याची कबुली अलीकडेच कृषिमंत्री माणिकराव कोकाटे यांनी दिली होती. त्यावरून शेतकऱ्यांमध्ये नाराजी उमटली होती. त्यानंतर राज्य सरकारने आता योजनेतील निधी वितरित करण्यास मान्यता दिली आहे. कृषि आयुक्तांकडून पात्र शेतकऱ्यांच्या बँक खात्यावर लाभ डीबीटीमार्फत जमा करण्यात येणार आहे.