Hingoli News : जिल्ह्यातील वसमत येथील बाळासाहेब ठाकरे हरिद्रा (हळद) संशोधन व प्रशिक्षण केंद्राला २०२३-२४ या आर्थिक वर्षासाठी एकूण १४ कोटी ७ लाख रुपये अनुदान मंजूर करण्यात आले आहे.

कृषी, पशुसंवर्धन, दुग्ध व्यवसाय विकास व मत्स्य व्यवसाय विभागाने गुरुवारी (ता. ७) याबाबत शासन निर्णय काढला आहे.

वसमत येथे बाळासाहेब ठाकरे हरिद्र (हळद) संशोधन व प्रशिक्षण केंद्र कंपनी कायद्यानुसार ‘ना नफा ना तोटा’ तत्त्वावर एक स्वायत्त संस्था म्हणून स्थापन करण्यास १४ सप्टेंबर २०२२ रोजीच्या शासना निर्णयाद्वारे मंजुरी देण्यात आली आहे.

या योजनेकरिता २०२३-२४ या आर्थिक वर्षासाठी निधी वितरणाचा प्रस्ताव प्राप्त झाला. त्यानुसार कृषी आयुक्तांना निधी देण्याची बाब विचाराधीन होती.

हळद संशोधन केंद्राकरिता सहाय्यक वतनेत्तर अनुदानासाठी ६ कोटी ७४ लाख रुपये व भांडवली मत्तेच्या निर्मितीसाठी ७ कोटी ३३ लाख असे एकूण १४ कोटी ७ लाख रुपये अनुदान मंजूर केले आहे.