Yavatmal News : हंगामाच्या सुरुवातीला कापसाचे दर ७२०० रुपयांपर्यंत पोहोचले होते. गेल्या काही दिवसात कापसाच्या दरात मोठी घसरण झालेली आहे. कापसाचे दर सद्यःस्थितीत ५८०० ते ६७०० रुपयांवर आले आहेत. दरात सातत्याने घसरण होत असल्याने शेतकऱ्यांची आर्थिक कोंडी झाली आहे.

सततच्या पावसामुळे कापसाच्या उत्पादनात निम्म्याने घट झाली आहे. कापसाचे दर ७२०० रुपयांच्या पुढे सरकले नसल्याने शेतकऱ्यांचा भ्रमनिराश झाला आहे. हंगामाच्या सुरुवातीला आंतरराष्ट्रीय बाजारात असलेली तेजी पाहता कापसाचे दर वाढण्याची शक्यता होती. कापसाचे दर वाढतील, असा तज्ज्ञांचा अंदाज होता.

त्यामुळेच शेतकऱ्यांनी कापसाची विक्री थांबविली होती. दर वाढण्याऐवजी घसरल्याने ऐन हंगामात बाजारात विक्रीला येणाऱ्या कापसाची आवक मंदावली होती. या हंगामात कापसाचे दर सात हजार दोनशे रुपयांच्या वर गेले नाहीत. काही दिवसांत वाढलेले दर खाली आले आहे. गेल्या काही महिन्यांपासून कापसाच्या दरात सातत्याने घसरण होत आहे. दर कोसळल्याने शेतकऱ्यांनी कापूस विकण्याऐवजी घरात साठवणूक केला आहे.

आता पुन्हा दरात घसरण झाली आहे. दरात घसरण झाल्याने शेतकऱ्यांनी कापूस केंद्राकडे पाठ फिरविली आहे. हंगामाच्या सुरुवातीपासून आत्तापर्यंत कापसाच्या दरात एक हजार रुपयांची घट झाली आहे. हमीभावाच्या तुलनेत दर खाली आल्यानंतरही शासकनाडून अजुनही शासकीय खरेदी केंद्र सुरू करण्यात आलेले नाहीत.

पावसाचा तीस टक्के क्षेत्राला फटका

कापूस निघाल्यानंतर अवकाळी पावसाने हजेरी लावली. अवकाळी पावसाने जवळपास ३० टक्के क्षेत्राला फटका बसला आहे. कापूस ओला झाल्याने सद्यःस्थितीत कापसाला पाच हजार आठशे रुपयांपासून दर मिळत आहे. हमीभावानुसार जवळपास एक हजार दोनशे रुपये शेतकऱ्यांना क्विंटलमागे कमी मिळत आहेत.