रिसोड, जि. वाशीम : राजमा पिकावर ‘पिवळा मोझ्याक’ (Yellow Mosaic On Rajma) म्हणजेच केवडा रोगाचा प्रादुर्भाव आल्यामुळे उत्पादनात (Rajma Production) मोठ्या प्रमाणात घट येण्याची शक्यता निर्माण झाली आहे.

हरभरा पिकाला पर्यायी पीक म्हणून या वर्षी रिसोड तालुक्यात पाचशे एकरांवर राजमा पिकाची लागवड करण्यात आली आहे. सध्या राजमा पीक संपूर्ण नष्ट होण्याच्या मार्गावर असल्यामुळे राजमा उत्पादक शेतकरी मोठ्या संकटात सापडला आहे.

रब्बीमध्ये हरभरा व गहू ही महत्त्वाची पिके असून, या पिकाची लागवड मोठ्या प्रमाणात केली जाते. परंतु मागील चार-पाच वर्षांपासून हरभरा उगवल्यानंतर मर (बुरशीजन्य रोग) लागत आहे.

त्यामुळे दरवर्षी हरभऱ्याच्या पिकामध्ये मोठी घट येत असल्यामुळे हरभरा या पिकाला पर्यायी पीक म्हणून तसेच फेरपालट म्हणून राजमा या पिकाची लागवड केली आहे. मागील वर्षी प्रायोगिक तत्त्वावर काही शेतकऱ्यांनी राजमा पिकाची लागवड केली होती.

या पिकांमधून चांगले उत्पन्न मिळाल्यामुळे या वर्षी रिसोड तालुक्यात जवळपास पाचशे एकरांवर राजमा पिकाची लागवड करण्यात आली आहे.

परंतु शेंगा परिपक्व होण्याच्या अवस्थेत एकाएकीच राजमा या पिकावर पिवळा मोझ्याकचा प्रादुर्भाव झाला आहे. दोन ते तीन दिवसांत सर्व पीक पिवळे पडले आहे. फवारणी करूनही काही फरक पडला नसल्याचे शेतकऱ्यांनी सांगितले आहे.

मागील वर्षी अर्ध्या एकरावर राजमाची पेरणी केली होती. उत्पन्न चांगले मिळाले होते. म्हणून या वर्षी चार एकर राजमा पेरला आहे. भोकरखेड या गावात तीस एकर राजमा पेरला आहे. मागील सात- आठ दिवसांपासून पीक पिवळे पडून वाळल्यासारखे दिसत आहे.

- संतोष विष्णू लांडगे, शेतकरी, भोकरखेडा, ता. रिसोड