Nagar News : निळवंडे धरणाच्या डाव्या कालव्यातील कामांच्या त्रुटी दुरुस्त करण्याचे काम अंतिम टप्प्यात आले आहे. हे काम पूर्ण होताच पाणी सोडण्यात येणार असल्याची माहिती देण्यात आली.

या बाबत मागील आठवड्यात जलसंपदा विभागाच्या अधिकाऱ्यांसोबत पालकमंत्र्यांनी बैठक घेतली. दोन दिवसांपूर्वी काँग्रेस नेते बाळासाहेब थोरात यांनाही निळवंडेतून पाणी सोडण्याची मागणी केली होती.

निळवंडे धरण कार्यक्षेत्रात यंदा पुरेसा पाऊस नाही. त्यामुळे लाभक्षेत्रातील पिकांचे नुकसान होत आहे. त्यामुळे निळवंडे धरणातून पाणी सोडावे, अशी मागणी होती. श्री. थोरात यांनाही त्याबाबत मागणी केली. माजी मुख्यमंत्री उद्धव ठाकरे यांच्याकडेही पाणी मिळत नसल्याबाबत कैफियत मांडली.

त्यामुळे धरणातून पाणी सोडण्याचा निर्णय घेतला आहे. पालकमंत्री राधाकृष्ण विखे-पाटील यांनी मागील आठवड्यात जलसंपदा विभागाच्या अधिकाऱ्यांच्या बैठकीत निळवंडे डाव्या कालव्यातून पाणी सोडण्याचे नियोजन करण्याच्या सूचना दिल्या होत्या.

दोन दिवसांपूर्वी पुन्हा आढावा घेतल्यानंतर उर्वरित काम अंतिम टप्प्यात असल्याचे अधिकाऱ्यांनी त्यांच्या निदर्शनास आणून दिले. काम पूर्ण होताच कालव्यातून पाणी सोडण्याचे नियोजन निश्‍चित करण्यात आले असल्याचे पालकमंत्र्यांनी स्पष्ट केले.‌

प्रकल्पाचा डावा कालवा अकोले तालुक्यातील भाग प्रामुख्याने डोंगराळ असल्यामुळे काही लांबीत एका बाजूला डोंगर व कठीण खडकातील खोदाई व दुसऱ्या बाजूला १४-१५ मी. उंचीचे माती भराव काम करून कालव्याचे काम करण्यात आले.

त्यामुळे कालवा खोदकाम करताना कालव्याच्या तळातील खडकास तडे गेले. त्यामुळे अकोले तालुक्यातील नीळ, म्हाळादेवी, मेहदुरी व कळसच्या भागामध्ये पाणी गळती होत होते. याच कारणामुळे शेतकऱ्यांनी आंदोलन केले होते. ही बाब प्राधान्याने विचारात घेण्यात आली आहे.

गळती रोखण्यास प्राधान्य

खडकाच्या भागामध्ये कालव्याच्या तळात आणखी खोदाई करून त्यात काळी माती भरणे, मोठ्या भरावाच्या ठिकाणी रिटेनिंग वॉल करणे अशा प्रकारच्या गळती प्रतिबंधक उपाययोजनेची कामे गतीने पूर्ण करण्यात येणार आहेत. त्यानंतर पाणी सोडण्यात येईल.