Parbhani News : परभणी व हिंगोली जिल्ह्यांतील सर्वच मंडलांत गेल्या १० ते १५ दिवसांपासून पावसाचा खंड पडला आहे. परिणामी, पिकांना पाण्याचा ताण बसला असून वाढ खुंटली आहे. हलक्या तसेच कमी ओलावा आलेल्या भारी जमिनीवरील पिके उन्हामध्ये सुकत आहेत. पावसाच्या खंडाचे दिवस वाढत असल्याने शेतकऱ्यांची चिंता वाढली आहे.

परभणी जिल्ह्यात यंदा जून, जुलै महिन्यांत सरासरीपेक्षा कमी पाऊस झाला आहे. ऑगस्ट महिन्यात गुरुवार (ता. १०) पर्यंत सरासरी ७३.५ मिलिमीटर पाऊस अपेक्षित असतांना ७.३ मिलिमीटर (९.९ टक्के) पाऊस झाला आहे. जिल्ह्यात १ जूनपासून आजवर ४२८ मिलिमीटर पाऊस अपेक्षित असताना यंदा प्रत्यक्षात २७३.९ मिलिमीटर (६२.५ टक्के) पाऊस झाला.

हिंगोली जिल्ह्यात जूनमधील पावसाची तूट जुलैमध्ये भरून निघाली; परंतु ऑगस्ट महिन्यात पावसाचे प्रमाण खूप कमी झाले असून, गुरुवार (ता. १०) पर्यंत सरासरी ७७.८ मिलिमीटर अपेक्षित असताना १२.१ मिलिमीटर (१५.६ टक्के) पाऊस झाला आहे.

१ जूनपासून आजवर ४७७.२ मिलिमीटर पाऊस अपेक्षित असताना प्रत्यक्षात ४३१.२ मिलिमीटर (९०.४ टक्के) पाऊस झाला. परभणी जिल्ह्यात सोयाबीनची २ लाख ५८ हजार हेक्टर व कपाशीची १ लाख ८४ हजार हेक्टरवर लागवड धरून एकूण ४ लाख ९० हजार हेक्टर पेरणी झाली आहे.

हिंगोली जिल्ह्यात २ लाख हेक्टर पेरणी व कपाशीची ३१ हजार ७९४ हेक्टर लागवड धरुन एकूण ३ लाख ३१ हजार ५१७ हेक्टर पेरणी झाली आहे. सुरुवातीला पेरणी झालेले तसेच कमी कालावधीच्या वाणाचे सोयाबीन फुलोरा अवस्थेत आहे.

लवकर लागवड केलेले कपाशीचे पीक पाते, फुले लागण्याच्या अवस्थेत आहे. उशिरा पेरणी केलेली पिके वाढीच्या अवस्थेत आहेत. उघडीप दिल्याने आंतरमशागतीच्या कामांनी वेग घेतला आहे. परंतु पावसाचा खंड पडल्याने हलक्या-बरड जमिनीतील ओलावा कमी झाला आहे.

उन्हामुळे पिके सुकत आहेत. धुरे, बाधांवर तसेच त्या जवळील जमिनीवर भेगा पडल्या आहेत. गवत सुकत आहे. ओलाव्याअभावी जिरायती क्षेत्रातील सर्वच पिकांची वाढ खुंटली आहे. सिंचनाची सुविधा असलेले शेतकरी पाणी देत आहेत.

परंतु वीजपुरवठा सुरळीत नाही. परभणी जिल्ह्यातील जिंतूर, गंगाखेड, पालम, हिंगोली जिल्ह्यातील हिंगोली, कळमनुरी, औंढा नागनाथ, सेनगाव तालुक्यांतील डोंगराळ भागातील तसेच इतर मंडलांतील हलक्या जमिनीवरील पीक परिस्थिती बिकट आहे.