Kolhapur Monsoon News : जिल्ह्याच्या पश्चिम भागात पावसाचा जोर रविवारी (ता. ९) सकाळपर्यंत कायम राहिला. राधानगरी धरणाच्या पाणी पातळीत वीस फुटांनी वाढ झाली आहे. गेल्या २४ तासांत धरणक्षेत्रात ८८ मिमी तर दाजीपुरात १२४ मिमी पाऊस झाला. आठवडाभरातील पावसाने धरणाच्या पाणी पातळीत वीस फुटांनी वाढ झाली आहे.

पाऊस सुरू होण्यापूर्वी पाणी पातळी २८७ फूट होती. ती शनिवारी (ता. ८) सायंकाळपर्यंत ३६० फुटांवर पोहोचली आहे. काळम्मावाडी धरणाच्या पाणीसाठ्यात पावणेदोन टीएमसीने वाढ झाली आहे. या धरण क्षेत्रात २४ तासांत ६७ मिमी तर तुळशीत ५१ मिमी पावसाची नोंद झाली.

तुळशी धरणाच्या पाणलोट क्षेत्रात पावसाचा जोर वाढला आहे. २४ तासात २९ मिमी पावसाची नोंद झाली. केळोशी बुद्रुक येथील लोंढा नाला प्रकल्प ३५ टक्के भरला आहे. दरम्यान, तुळशी धरणातून सोडण्यात आलेला नदीपात्रातील विसर्ग बंद करण्यात आला आहे.

रविवार दुपारपासून राधानगरी धरणातून वीजनिर्मितीसाठी ७०० क्युसेक पाण्याचा विसर्ग सुरू करण्यात आला आहे. संततधार पावसाने पाणीसाठ्यात होणारी वाढ नियंत्रित राखण्यासाठी बीओटी तत्त्वावरील वीज केंद्रातून वीजनिर्मिती सुरू झाली आहे.

मात्र धरण पायथ्याशी असलेल्या आणि बंद केलेल्या जुन्या जलविद्युत निर्मिती केंद्रातून वीज निर्मितीला ‘महाजेनको’कडून अद्याप हिरवा कंदील मिळालेला नाही. यंदाच्या पावसाळ्यात या केंद्रातून पूर्ववत वीजनिर्मिती सुरू करण्यासाठी तीन महिन्यांपूर्वीच जनित्र संचाची विशेष देखभाल दुरुस्ती पूर्ण करण्यात आली आहे.