आजरा, जि. कोल्हापूर ः सुगीच्या हंगामात आजरा तालुक्यात हत्तीबरोबरच गव्यांच्या कळपांचा उपद्रव सुरू झाला आहे. हातातोंडाशी आलेले पीक (Crop) वन्यप्राणी फस्त करीत आहेत. त्यामुळे शेतकरी हवालदिल झाला आहे. मुरुडे (ता. आजरा) येथील अलका पांडुरंग पाटील यांच्या शेतातील नागली व भात पिकाचे गव्यांच्या कळपाने मोठ्या प्रमाणात नुकसान केले. सुमारे पावणे दोन एकरांतील पीक तुडवून नुकसान केले.

मुरुडे गावानजीक पाटील यांचे शेत आहे. त्यांनी यंदा भात व नागली ही पिके घेतली आहेत. पावसामुळे भात कापणी व नागली शेंडलणीचे काम लांबले असताना गव्यांनी पाटील यांच्या शेतातील हातातोंडाशी आलेले भात व नागलीचे पीक तुडवून नुकसान केले.

यामुळे पाटील यांचे सुमारे लाख रुपयांचे नुकसान झाले आहे. गव्यांचा कळप मुरुडे जंगलानजीक राहत आहे. रात्रीच्या वेळी तो पिकात उतरून नुकसान करीत आहे. मागील काही दिवसांत गव्यांचा उपद्रव सुरू आहे. वन विभागाने तातडीने गव्यांचा बंदोबस्त करावा, अशी मागणी शेतकरी करीत आहेत.