ॲग्रोवन वृत्तसेवा
Nashik Onion Market : जिल्ह्यातील अस्मानी संकटामुळे सर्व शेतकऱ्यांचे कंबरडे मोडले आहे. उन्हाळ कांदा पावसाच्या व गारपिटीच्या तडाख्यात ३० ते ४० टक्के खराब झाला आहे.

उर्वरित ५० टक्के कांदा ब प्रतवारीचा असून तो उत्पादन खर्चाच्या खाली विक्री होत आहे.

त्यामुळे कांदा उत्पादकांचे दुःख शासनाने जाणून तत्परतेने मदत करावी, अशी मागणी रयत क्रांती संघटनेच्या वतीने मुख्यमंत्री एकनाथ शिंदे यांच्याकडे करण्यात आली.

माजी कृषी राज्यमंत्री सदाभाऊ खोत यांनी मंगळवार (ता.३०) रोजी कांदा प्रश्नासंदर्भात शिष्टमंडळासह मुख्यमंत्री आणि उपमुख्यमंत्र्यांची भेट घेतली.

या वेळी माजी शिष्टमंडळात रयत क्रांती संघटनेचे प्रदेशाध्यक्ष दीपक पगार, कोअर कमिटीचे सदस्य शिवनाथ जाधव, नाशिक जिल्हाध्यक्ष विशाल पवार, युवराज देवरे, नितीन कोर, मधुकर कापडणीस आदी उपस्थित होते.

शेतकऱ्याला १ किलो कांदा पिकविण्यासाठी १० ते १२ रुपये उत्पादन खर्च येतो. बाजारात कांदा १ ते ४ रुपयांनी सरासरी विकला जात आहे.

अवकाळीने डाळिंब व द्राक्ष बागेचे नुकसान झालेआहे. डाळिंबाची फूलगळ होऊन खोडास इजा पोहोचली आहे. कांदाचाळ शेड व राहत्या घराचे हवेत पत्रे उडून मोठे नुकसान झाले आहे.

त्यामुळे शासनाने मदत करावी. अन्यथा अधिकाऱ्यांना घेराव घालावा लागेल. मोठे जन आंदोलन उभे करावे लागेल, असा इशारा सरकारला देण्यात आला आहे.

संघटनेच्या मागण्या अशा...
- लाल कांद्याप्रमाणेच उन्हाळ कांद्यास प्रतिक्विंटल रुपये ५०० प्रमाणे अनुदान जाहीर करा
-मध्यप्रदेश शासनाच्या कांदा भावांतर योजनेच्या धर्तीवर महाराष्ट्र शासनाने बाजार समितीतील भावांतर योजनेत कांदा खरेदी करावा.

- नाफेडची कांदा खरेदी त्वरित चालू करावी
- नाफेडचे चाळीचे जिओ टॅग करून फोटो काढावेत. मगच कांदा चाळीत कांदा भरण्याची अनुमती नाफेडने द्यावी.

- चालूवर्षी पिकासाठी आलेले वीजबिल स्वतः शासनानेच भरून द्यावे.