Pune News : भोर तालुक्याच्या पश्‍चिम भागातील हिरडस मावळातील शेतकरी भात पिकांचे रानटी जनावरांपासून रक्षण व्हावे यासाठी जुन्या साड्या, रंगीत कापडांचा वापर करून कुंपण तयार करीत असल्याचे चित्र सध्या सगळीकडे दिसून येत आहे.

भोर तालुक्यातील हिरडस मावळ भाग हा डोंगराळ आणि दाट झाडीचा असल्याने या भागात रानटी जनावरांचा वावर जास्त आहे. यात प्रामुख्याने रानडुक्कर, सांबर, ससे आणि मोर यांचा समावेश जास्त आहे. या प्राण्यांपासून भात, नाचणी व वरई ही पिके वाचविण्यासाठी शेतकऱ्यांना कापडी कुंपणांबरोबरच वेगवेगळ्या युक्त्या कराव्या लागत आहेत. पावसाच्या लहरीपणामुळे शेतकरी आधीच अडचणींचा सामना करत आहे. त्यात आता रानटी प्राण्यांच्या त्रासाने शेतकऱ्यांना आर्थिक तोटा सहन करावा लागत आहे.

रानटी प्राण्यांच्या त्रासातून मुक्तता होण्यासाठी कायम स्वरूपी कुंपणासाठी शासनाने आर्थिक साह्य करावे तसेच रानटी प्राण्यांमुळे झालेल्या नुकसानीची भरपाई वन विभागाकडून अल्प मिळत असल्याने ती वाढवून देण्यात यावी अशी मागणी हिर्डोशी येथील शेतकरी धोंडिबा मालुसरे व संतोष धामुनसे यांनी केली आहे.