Sugarcane Conference कोल्हापूर ः महाराष्ट्र राज्य ऊस उत्पादक संघाच्या वतीने १२ मार्चला राज्यस्तरीय ‘ऊस विकास परिषद’ (Sugarcane Development Conference) बामणी (ता. कागल) येथे होणार आहे, अशी माहिती महाराष्ट्र राज्य ऊस उत्पादक संघाचे संस्थापक अध्यक्ष अतुल माने-पाटील व किरण चव्हाण यांनी पत्रकार परिषदेत दिली.

सकाळी दहा ते दुपारी एक या वेळेत ही परिषद होईल. या वेळी विविध पुरस्कारांचे वितरण होणार आहे.

ऊस शेतीमधील समस्या वाढत आहेत. या समस्यांवर उपाययोजना करण्यासाटी ऊस शेतीतील विचारवंत आणि ऊस शेतीशी पूरक उद्योजक एकत्र येऊन चर्चा करणार आहेत. कृषिभूषण संजीव माने, उत्तमराव परीट, सत्यजित भोसले आदी तज्ज्ञांचे परिषदेत मार्गदशन होणार आहे.

या वेळी महाराष्ट्र राज्य ऊस उत्पादक संघाच्या वतीने पश्चिम महाराष्ट्रतील प्रगतिशील उस उत्पादकांना ‘ऊस भूषण कार्यगौरव’ पुरस्कार देऊन गौरवण्यात येणार आहे. तसेच महाराष्ट्र ऊस विकास कार्यगौरव, महाराष्ट्र आदर्श कृषी पत्रकार कार्यगौरव आदी पुरस्कारांनी विविध मान्यवरांना गौरवण्यात येईल.

दै. ‘सकाळ’ ‘ॲग्रोवन’चे कोल्हापूर जिल्हा प्रतिनिधी राजकुमार चौगुले यांनाही महाराष्ट्र आदर्श कृषी पत्रकार कार्यगौरव पुरस्काराने सन्मानित करण्यात येणार आहे. शेतकऱ्यांनी ऊस विकास परिषदेत सहभाग नोंदवावा, असे आवाहन माने-पाटील यांनी केले.