Weather Update पुणे : उन्हाचा चटका वाढला असतानाच, राज्यात पावसाला पोषक हवामान झाल्याने ढगाळ हवामान (Cloudy Weather) होत आहे. आज (ता. ५) राज्यात पावसाचा अंदाज आहे.

विदर्भ, मराठवाडा आणि उत्तर महाराष्ट्रात तुरळक ठिकाणी वादळी वारे, विजा, मेघगर्जनेसह हलक्या ते मध्यम पावसाचा इशारा (Rain Forecast) देण्यात आला आहे.

कोकण आणि मध्य महाराष्ट्रातही विजांसह पावसाचा अंदाज आहे. राज्यात उन्हाचा चटका देखील कायम राहणार आहे.

राज्यात उन्हाळा हंगामाला सुरूवात झाल्याने कमाल तापमानात चांगलीच वाढ झाली आहे. कमाल तापमान ३७ अंशांच्या पुढे गेल्याने उन्हाच्या झळा वाढत आहेत. दुपारच्या वेळी घराबाहेर पडणे देखील तापदायक ठरत आहे.

शनिवारी (ता. ४) सकाळपर्यंतच्या २४ तासांमध्ये ब्रह्मपुरी, बुलडाणा, अकोला येथे राज्यातील उच्चांकी ३८.२ अंश, तर वाशीम, अमरावती, नांदेड, जळगाव, रत्नागिरी येथेही ३७ अंश सेल्सिअस तापमानाची नोंद झाली.

राज्याच्या किमान तापमान वाढल्याने थंडी नाहिसी झाली आहे. शनिवारी (ता. ४) राज्यात जवळपास सर्वच ठिकाणी किमान तापमानाचा पारा १३ अंशांच्या पुढे गेला आहे. आज (ता. ५) राज्यात वादळी पावसाची शक्यता आहे.

राज्यात गारपिटीची शक्यता

गुजरात आणि परिसरावरील चक्राकार वारे तसेच वाऱ्यांच्या मधल्या थरात असलेल्या हवेच्या कमी दाबाच्या पट्ट्यामुळे राज्यात वादळी पावसाला पोषक हवामान आहे. वादळी पावसाबरोबरच मंगळवारपर्यंत (ता. ७) राज्यात तुरळक ठिकाणी गारपीट होण्याची शक्यता आहे.

वादळी पावसाचा इशारा (येलो अलर्ट) :

मध्य महाराष्ट्र : नगर.

मराठवाडा : औरंगाबाद, जालना.

विदर्भ : बुलडाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदिया, चंद्रपूर, गडचिरोली.