Pune News : जुन्नर तालुक्यात खरीप पिकांच्या पेरणीची कामे सध्या जोरात सुरू आहेत. बहुतांश शेतकऱ्यांचा सोयाबीन पिकाकडे जास्त कल असल्याचे पहावयास मिळते. अजून पुरेसा पाऊस झाला नाही तरी आज ना उद्या पाऊस होईल, या आशेने शेतकरी बांधव पेरणी करत असल्याचे पहावयास मिळते.

काही ठिकाणी धूळ वाफेवर पेरणी केलेली पिके उगवून आली आहेत. अनेक शेतकऱ्यांनी शेतामध्ये अंतर मशागती नंतर दोन ते अडीच फुटाच्या सऱ्या काढून वरंब्याच्या दोन्ही बाजूला टोकण पद्धतीने सोयाबीनची लागवड केली आहे.

या पद्धतीमध्ये कमी बियाण्यात लागवड होऊन उत्पादन चांगले मिळत असून उत्पादन खर्च कमी होत असल्याचे शेतकरी सांगतात.

साधारणपणे एक एकर क्षेत्रामध्ये पेरणीसाठी सोयाबीनचे २० ते २२ किलो तर टोकण पद्धतीने लागवडीसाठी १२ ते १५ किलो बियाणे लागते.

शिवाय जास्त पावसात पेरणी करणे शक्य होत नाही, अशावेळी सरीवर टोकन पद्धतीची लागवड करणे सहज शक्य होते.

...या वाणांना मागणी

सध्या बाजारात सोयाबीन बियाण्याच्या विविध प्रजाती उपलब्ध असून `केडीएस ७२६`, `फुले संगम`, `फुले दूर्वा`, `केडीएस ७५३`, `फुले किमया` या जातींना विशेष मागणी आहे.