अकोला ः यंदाच्या मोसमातील सोयाबीन हंगामाला (Soybean Season) लवकरच सार्वत्रिक स्वरूपात प्रारंभ होत आहे. सोयाबीन सोंगणीसाठी (Soybean Harvesting) मजुरांची शोधाशोध शेतकरी घेत आहे. मजुरांनी (Labor Wage Soybean Harvesting) यंदा त्यांचे दर सर्वत्र वाढविले आहेत. एकरी २८०० पासून, तर ३४०० पर्यंत वेगवेगळे दर भागनिहाय ठरवले जात आहेत. गेल्या वर्षांच्या तुलनेत ४०० ते ५०० रुपयांनी ही दरवाढ झाली आहे, असे शेतकऱ्यांनी सांगितले.

सध्या पावसाने थोडा दिलासा दिल्याने सोयाबीन कापणीसाठी शेतकरी मजुरांची जुळवाजुळव करण्यात व्यस्त आहेत. जमिनीत ओल असल्याने यंदा अनेक भागांत सध्या हार्वेस्टर शेतापर्यंत पोहोचणे कठीण आहे. परिणामी मजुरांकडूनच सोयाबीन सोंगणी, सुडी लावण्याचे काम करवून घेणे सुरू आहे. हार्वेस्टरनेही सोयाबीन काढणीचा दर १५०० रुपये आहे, असे शेतकऱ्यांनी सांगितले.

यंदा सातत्याने पाऊस झाल्याने काही भागात सोयाबीनला मोठा फटका बसला. कमी सूर्यप्रकाशामुळे पिकाची वाढ पुरेशी झालेली नाही. मोजक्याच पट्ट्यात सोयाबीनचे पीक चांगले आहे. लागवडसुद्धा एकसारखी नसल्याने सोयाबीनची काढणी आता मागे-पुढे होत आहे.

सुरुवातीच्या टप्प्यातील सोयाबीन काढणीसाठी तयार आहे. सोयाबीनचा उत्पादन खर्च भरमसाट वाढला आहे. शेतकऱ्यांना १५ ते २० हजारांदरम्यान एकरी खर्च आला आहे. आता उत्पादकता काय येते आणि दर कसे राहतात, यावर सोयाबीन उत्पादकांचे नफातोट्याचे अर्थकारण अवलंबून आहे.