सवणा (ता. चिखली) परिसरात दिवसाची पाळी ही सकाळी सात ते दुपारी तीनपर्यंत आहे. रात्रीची पाळी ही १०.५० ते सकाळी ६.५० अशी आहे. दिवसाच्या वेळी नियोजन करणे सोपे जाते. चार ते सहा तासांचा स्प्रिंकलरचा एक टप्पा राहतो. ही वेळ झाली की लगेच दुसरा टप्पा येतो. पण पुरेशी वीज नसल्याने काही वेळेस एका दिवशी दोन किंवा दोन दिवसांमिळून तीन टप्पे होतात. रात्री हे पाइप बदलण्याचे काम कठीण आहे.

तेल्हारा तालुक्यात माळेगाव फिडरवर रात्री ११.१० वाजता पुरवठा सुरू होऊन सकाळी ७.१० वाजता बंद होतो. शेतकऱ्यांना कृषिपंप सुरू करण्यासाठी रात्री ११ वाजेपर्यंत शेतात राहावे लागते. तर, दुसरा टप्पा चार तासांनी बदलण्यासाठी पुन्हा पहाटे तीन वाजता जावे लागते.

जानेफळ या आमच्या भागात दुपारी तीन ते रात्री दहापर्यंत वीज राहते. त्यात एक दोन वेळा पुरवठा सुरू बंद होतो. मोठ्या कसरतीने स्प्रिकंलरचा एक टप्पा होतो. ओलिताचे काम विजेअभावी दहा बारा दिवस चालते.

आमच्या भागात मेडशी मालेगाव सबस्टेशन ४८ तासांत १६ तास एकसारखा वीजपुरवठा देते. पण वीज एकसारखी मिळत नाही. १६ तास वीज दिल्यामुळे खोळंबा होत आहे. दिवसा १२ तास वीज मिळायला हवी.

आमच्याकडे रात्री १२.४५ वाजता पुरवठा सुरू होऊन सकाळी ८.४५ पर्यंत सुरू राहतो.आठवड्यातील चार दिवस असे शेड्यूल असते. इतर दिवशी सकाळी ८.४५ ते दुपारी ४.४५ अशी तीन दिवस वीज मिळते.