Pune News : भवानीनगर (ता. इंदापूर) येथील श्री छत्रपती सहकारी साखर कारखान्याने सन २०२२-२३ च्या गळीत हंगामातील उसाचा दुसरा हप्ता १५० रुपये प्रतिटनाप्रमाणे सभासदांच्या खात्यावर जमा केल्याची माहिती कारखान्याचे अध्यक्ष प्रशांत काटे व उपाध्यक्ष अमोल पाटील यांनी दिली.

श्री छत्रपती कारखान्याने गेल्या वर्षीच्या सन २०२२-२३ च्या गळीत हंगामामध्ये सुमारे ८ लाख ९५ हजार टन उसाचे गाळप केले होते. त्यातून ९ लाख ४९ हजार ५९५ क्विंटल साखरेची निर्मिती झाली.

गेल्या गळीत हंगामामध्ये सरासरी १०.६१ टक्के साखरेचा उतारा मिळाला होता. गळीत हंगामातील एफआरपीची रक्कम प्रतिटन २४६२.४४ रुपये होती. कारखान्याने यापूर्वी २३५० रुपयांचा पहिला हप्ता सभासदांना दिला होता.

कारखान्याने दुसरा हप्ता १६० रुपये प्रतिटन काढला असून, यामध्ये १० रुपये प्रतिटन भागविकास निधीसाठी कपात केली आहे. उर्वरित १५० रुपये प्रतिटनाप्रमाणे १३ कोटी ४८ लाख रुपये सभासदांच्या खात्यावर जमा केले.