Wada News : वाडा तालुक्यात बारमाही मुबलक पाणी असणाऱ्या वैतरणा, पिंजाळ, गारगावी, देहर्जे व तानसा अशा नद्या आहेत. मात्र, नियोजनाअभावी यातील काही नद्या कोरड्याठाक पडतात. तानसा नदीवर बंधारे नसल्याने ती मार्चअखेरपर्यंत कोरडी पडते. त्यामुळे पिण्याच्या व सिंचनाच्या पाण्याचा प्रश्न गंभीर होत आहे. नदी कोरडी पडल्याने पाण्याची समस्या निर्माण झाली आहे.

वाडा तालुक्यात १७० गावे व २५० हून अधिक पाडे आहेत. तालुक्याची लोकसंख्या दोन लाखांच्या आसपास आहे. तालुक्यात औद्योगिकीकरणाचा ओढा वाहत आहे. त्यामुळे लोकसंख्येतही वाढ होत आहे. मात्र, त्यामानाने पाणी पुरवठा होत नाही. औद्योगिकीकरणामुळे रोलिंग मिल शितपेये कारखाने आले आहेत. या कंपन्यांना पाण्याची मोठी गरज असल्याने पाण्याचा मोठा उपसा होत असतो.

त्यासाठी खासगी कूपनलिका टॅंकरने पाण्याचा उपसा केला जातो. त्यामुळे पाण्याची पातळी खोल गेल्याचे दिसून येत आहे. पूर्वी २०० ते २५० फुटांवर पाणी लागायचे आता ५०० फुटांपर्यंत कूपनलिका मारावी लागते.

येथील काही कंपन्यांना दररोज लाखो लिटर पाणी लागते. सरकारने येथील पाण्यात वाटेकरी निर्माण केले; मात्र त्याचे नियोजन किंवा साधने उपलब्ध १५ ते २० वर्षांत केली नाहीत. त्यामुळे पाण्याचा प्रश्न गंभीर होत चालला आहे.

तालुक्यात वैतरणा, पिंजाळ, देहर्जे व गारगावी या नद्यांवर काही ठराविक भागात बारमाही पाणी असते. या नद्यांवर काही किमी अंतरावर बंधारे असल्याने येथे बारमाही पाणी असते; मात्र तानसा नदीवर बंधारे नसल्याने किंवा बांधलेले बंधारे फोल ठरल्याने ही नदी मार्च अखेरपर्यंत आटते.

कोरडीठाक पडते. त्यातील अपवाद वगळता काही बंधारे निकृष्ट दर्जाचे झाल्याने किंवा बंधारे जिथे गरजेचे आहेत तिथे न घेतल्याने फेब्रुवारी अखेरपर्यंत पाणी शिल्लक राहत नाही. त्यामुळे तानसा नदी कोरडी ठाक पडलेली आहे.