Satara News : माळेगाव सहकारी साखर कारखान्याची रिकव्हरी ११.८१ असताना प्रति टन ३४११ याप्रमाणे मागील वर्षाच्या उसाला भाव दिला आहे. राज्यातील इतर कारखान्यांनी उसाला दुसरा हप्ता पाचशे रुपये द्यावा यासाठी आपण योग्य त्या सूचना द्याव्यात, अशी मागणी रयत क्रांती संघटनेच्या वतीने पश्चिम महाराष्ट्र अध्यक्ष सचिन नलवडे यांनी उपमुख्यमंत्री अजित पवार यांच्याकडे केली आहे.

उपमुख्यमंत्री अजित पवार रविवारी (ता.१०) कऱ्हाडच्या (जि.सातारा) दौऱ्यावर असताना श्री. नलवडे यांनी त्यांच्याशी भेटून निवेदन दिले. निवेदनातील माहिती अशी, की माळेगाव सहकारी साखर कारखान्यांनी एफआरपीपेक्षा अधिक दर दिल्याबद्दल त्यांचे अभिनंदन केले. कारखाना व्यवस्थापन चांगले असेल तर रिकव्हरी कमी असली तरी कारखाने एफआरपीपेक्षा जास्तीचा दर देऊ शकतात हे माळेगाव व सोमेश्वर या कारखान्यांनी दाखवून दिले आहे.

सध्या साखरेचे भाव ३५ ते ३६ रुपयांच्या पुढे आहेत. कारखान्यांनी इथेनॉल सहवीज निर्मिती यासारखे अधिक उत्पन्न देणारे उपपदार्थ तयार केले आहेत. त्यामुळे कारखान्यांनी उसाचा दुसरा हप्ता पाचशे रुपये देता येणार आहे. माळेगाव कारखान्याची रिकव्हरी ११.८१ व सोमेश्वर कारखान्याची रिकवरी ११.९१ असताना दोन्ही कारखान्यांनी ३३५० व ३४१ एवढा उसाला भाव दिलेला आहे.

सातारा, सांगली, कोल्हापूर या भागांमध्ये कारखान्याच्या रिकव्हरी बाराच्या पुढे आहे. त्यांना आणखी पाचशे रुपये उसाला देणे सहज शक्य आहे. राज्यातील इतर कारखान्यांनी व सातारा जिल्ह्यातील कारखान्यांनी संबंधित दोन्ही कारखान्यांचा आदर्श घेऊन शेतकऱ्यांना यावर्षीचा उसाचा दुसरा हप्ता पाचशे रुपये प्रमाणे द्यावा अशा सूचना द्याव्या अशी मागणी करण्यात आली.