सिंधुदुर्गनगरी ः यावर्षी भात खरेदी हंगाम (Paddy Procurement Season) अवघ्या दोन महिन्यावर आला असला तरी गेल्यावर्षीच्या हंगामातील भातविक्रीचा बोनस (Paddy Bonus) आजमितीस जिल्ह्यातील शेतकऱ्यांना मिळालेला नाही. त्यातच शासनपातळीवर कोणताही सकारात्मक निर्णय देखील होत नसल्यामुळे शेतकऱ्यांमध्ये नाराजीचा सुर आहे. बोनस मिळणार की नाही, असा सभ्रंम शेतकऱ्यांमध्ये आहे.

यावर्षीचा भातखरेदी हंगाम नोव्हेंबरमध्ये सुरू होण्याची शक्यता आहे. गेल्यावर्षीच्या हंगामात जिल्ह्यात विक्रमी भात विक्री झाली. जिल्ह्यातील ३५ भातखरेदी केंद्रांवर ८९ हजार ८०० किव्टंल भातखरेदी झाली होती. शासनाने भातखरेदीचा दर प्रतिक्विंटल १ हजार ८६८ रुपये जाहीर केला होता. त्यानुसार जिल्ह्यातील शेतकऱ्यांच्या खात्यात १६ कोटी ७७ लाख ४६ हजार रुपये जमा करण्यात आले. यापूर्वी शासनाने प्रतिक्विंटल ७०० रुपये बोनस दिला होता.

त्यानुसार जिल्ह्यातील शेतकऱ्यांना देण्यात आला असता, तरी शेतकऱ्यांच्या खात्यात ६ कोटी २८ लाख ६० हजार रुपये जमा झाले असते. तशीच बोनसची अपेक्षा शेतकऱ्यांना होती. मात्र यावर्षीचा हंगाम सुरू होण्यास अवघे काही महिने शिल्लक आहेत. तरीदेखील बोनस संदर्भात शासनपातळीवर कोणताही ठोस निर्णय झालेला नाही. त्यामुळे बोनस मिळणार की नाही, असा प्रश्न भात उत्पादक विचारत आहेत. शासनाने बोनस लवकरात लवकर द्यावा, अशी त्यांची मागणी आहे.