भोकरदन, जि. जालना : बँकांना शेतकऱ्यांना तातडीने पीककर्ज वाटप (Crop Loan) करण्याचे आदेश देण्याची मागणी बळीराजा फाउंडेशनचे अध्यक्ष नारायण लोखंडे (Narayan Lokhande) यांनी सहकारमंत्री तथा जालना जिल्ह्याचे पालकमंत्री अतुल सावे (Atul Save) यांच्याकडे केली आहे.

बळीराजा फाउंडेशनच्या मागणीनुसार तालुक्यातील बँक ऑफ महाराष्ट्र, भारतीय स्टेट बँक तसेच अन्य राष्ट्रीयकृत बँका शेतकऱ्यांना पीककर्ज देण्यास विलंब करीत आहेत. खरीप हंगाम संपला तरी ही राष्ट्रीयकृत बँका शेतकऱ्यांना पीककर्ज देत नसल्याने शेतकऱ्यांचे आर्थिक गणित कोलमडले आहे.

सावकरी कर्ज काढून शेतकऱ्यांनी शेती केली आहे. त्यामुळे शेतकरी आर्थिक अडचणीत सापडला आहे. शेतकऱ्यांनी पीककर्ज मिळण्यासाठी मे महिन्यात ऑनलाइन अर्ज करून सर्व माहिती भरलेली होती;

मात्र चार महिने उलटूनही शेतकऱ्यांना पीककर्ज मिळत नसल्याने शेतकऱ्यांमधून रोष व्यक्त होत आहे. शेतकरी बँकामध्ये चकरा मारून थकलेले आहे. त्यामुळे तातडीने पीककर्ज वाटप करण्याची मागणी नारायण लोखंडे यांनी सहकारमंत्री अतुल सावे यांची औरंगाबाद येथे भेट घेऊन शेतकऱ्यांची कैफियत मांडत केली आहे. यावेळी

शेतकऱ्यांच्या पाठीशी सरकार खंभीरपणे उभे आहे. राष्ट्रीयकृत बँकांना शेतकऱ्यांना पीककर्ज वाटप करण्याचे आदेश देणार असल्याचे मंत्री सावे यांनी सांगितल्याचे श्री. लोखंडे यांनी सांगितले.