Pune News : पुणे कृषी उत्पन्न बाजार समितीमधील अडत्यांनी आपल्या गाळ्यांवर केवळ दोन मदतनीस आणि एक सहाय्यक असल्याचे प्रतिज्ञापत्र सादर करण्याला अखेर मुहूर्त सापडला आहे.

बाजार समितीमधील परवानाधारक सुमारे ७०० अडत्यांपैकी मंगळवारी (ता.२५) केवळ चार अडत्यांनी प्रतिज्ञापत्र सादर करून बाजार समितीची बोळवण केली आहे. तर अडते असोसिएशनने प्रतिज्ञापत्र सादर करण्यासाठी ३१ जुलैची मुदत मागितली असल्याचे फळे भाजीपाला विभागप्रमुख महेंद्र काळभोर यांनी सांगितले.

‘बाजार समिती अडत्यांपुढे हतबल’ या दै.‘ॲग्रोवन’च्या सोमवारी (ता.२४) प्रसिद्ध झालेल्या वृत्तानंतर बाजार समिती अडत्यांवर कारवाईसाठी सरसावली होती. मात्र अडते असोसिएशनने प्रतिज्ञापत्र सादर करण्यासाठी ३१ जुलैची मुदतवाढ मागितल्याने कारवाई थंड झाल्याने केवळ फार्स असल्याचे समोर आले आहे.

पुणे बाजार समितीमधील फळे भाजीपाला विभागातील डमी अडत्यांना चाप लावण्यासाठी संचालक मंडळाने काढलेल्या आदेशाला अडत्यांनी केराची टोपली दाखविली आहे. एक महिना होऊन सुद्धा एकाही अडत्याने प्रतिज्ञापत्र सादर न केल्याने बाजार समिती संचालक मंडळ आणि प्रशासन अडत्यांपुढे हतबल झाले आहे.

त्यामुळे प्रशासनाने अखेर कारवाईचे हत्यार उपसले आहे. मंगळवारपासून (ता.२५) शेतीमाल जप्तीच्या कारवाईचे संकेत प्रशासनाने दिले होते. मात्र अजून एकही कारवाई करण्यात आली नसल्याचे काळभोर यांनी सांगितले.

तू..तू...मैं...मै...

प्रतिज्ञापत्र सादर करण्यासाठी अडत्यांचा विरोध आहे. तर अडते असोसिएशनचे अध्यक्षच बाजार समितीचे संचालक आहेत. त्यामुळे कोणाची बाजू घ्यावी या कात्रीत ते सापडले आहेत. यामुळे अडते असोसिएशननेच सामूहिक प्रतिज्ञापत्र सादर करावे, असा आग्रह अडत्यांनी धरला आहे. त्यामुळे असोसिएशन, संचालक आणि अडत्यांमध्ये तू..तू..मैं..मै..सुरू झाली आहे.