Pune News : राज्यात यंदा पावसाअभावी काही भागात पेरण्या रखडल्या आहेत. मात्र शेतकऱ्यांनीकडून ई-पीकपाहणी वेगात सुरू आहे. ई-पीकपाहणीत यंदा दीड कोटी शेतकरी सहभागी होण्याची शक्यता आहे.

पीककर्ज मिळण्यासाठी तसेच पीकविमा, किमान आधारभूत धान्य खरेदी तसेच नैसर्गिक आपत्तीमधील मदत वाटपाकरिता ई-पीकपाहणीच्या नोंदी वापरण्यास शासनाने मान्यता दिलेली आहे.

त्यामुळे यंदा जास्तीत जास्त शेतकरी ई-पीकपाहणीत सहभागी होण्याची शक्यता आहे. तलाठ्याकडे न जाता आपल्या भ्रमणध्वनीच्या मदतीने शेतात जावून ई-पीकपाहणी करण्याची व नोंदणी करण्याची सुविधा शासनाने दिलेली आहे. या प्रकल्पाला १५ ऑगस्ट २०२१ रोजी सुरुवात झाली आहे. आता देशातील इतर राज्यांमध्येही ई-पीकपाहणी प्रकल्प सुरू केले जात आहेत.

नैसर्गिक आपत्तीमधील मदत मिळण्यासाठी ई-पीकपाहणीचा तपशील पाहिला जातो. यंदा पावसाअभावी पीक वाया गेल्यास किंवा पुढे जास्त पाऊस झाल्याने पिकाचे नुकसान झाल्यास भरपाई मिळण्यासाठी ई-पीकपाहणीच्या नोंदी उपयुक्त ठरणार आहेत.

त्यामुळे ई-पीकपाहणीसाठी शेतकऱ्यांची गावशिवारात लगबग सुरू आहे. आतापर्यंत १ लाख ७१ हजार शेतकऱ्यांनी सव्वादोन लाख हेक्टरवरील पिकांची ई-पीकपाहणी करीत नोंदणी केली आहे.

खरीप २०२२ च्या हंगामात एक कोटी ५३ लाख हेक्टर क्षेत्राची ई-पीकपाहणी एक कोटी १४ लाख शेतकऱ्यांनी केली आहे. ‘‘ई-पीकपाहणीसाठी भ्रमणध्वनी उपयोजन (अॅप्लिकेशन) वापराची नोंदणी केलेल्या शेतकऱ्यांची एकूण संख्या आता एक कोटी ८८ लाखांच्या पुढे गेली आहे, गेल्या हंगामात ९१ टक्के ई-पीकपाहणी झाली होती. चालू खरिपात मात्र १०० टक्के ई-पीकपाहणी होईल असा आमचा अंदाज आहे,’’ अशी माहिती महसूल विभागाच्या सूत्रांनी दिली.