MSP Guarantee Conference परभणी ः स्वाभिमानी शेतकरी संघटनेतर्फे (Swabhimani Shetkari Sanghatana) रविवारी (ता. १२) दुपारी १२ वाजता परभणी येथे ‘एमएसपी गॅरंटी’ परिषद आयोजित करण्यात आली आहे, अशी माहिती जिल्हाध्यक्ष किशोर ढगे यांनी दिली.

परभणी येथील वसमत रस्त्यावरील श्री शिवाजी महाविद्यालयाच्या सभागृहामध्ये आयोजित ‘एमएसपी गॅरंटी’ परिषदेस स्वाभिमानी शेतकरी संघटनेचे संस्थापक अध्यक्ष माजी खासदार राजू शेट्टी, एमएसपी गॅरंटी किसान मोर्चाचे राष्ट्रीय अध्यक्ष सरदार व्ही. एम. सिंग, नामांकित विधिज्ञ अॅड. असिम सरोदे यांची प्रमुख उपस्थिती राहणार आहे.

शेतीमालास किमान आधारभूत किंमत (हमीभाव) लागू करूनही त्यास संरक्षण नाही. त्यामुळे शेतकऱ्यांकडून हमीभावापेक्षा कमी दराने खरेदी केली जाते.

कोणत्याही शेतीमालाची हमीभावापेक्षा कमी दराने खरेदी करता येणार नाही. त्यादृष्टीने आवश्यक कायदा केंद्र शासनाने मंजूर करून लागू करावा, या प्रमुख मागणीसाठी ही परिषद आयोजित करण्यात आली आहे, असे ढगे यांनी सांगितले.