Parbhani News : या वर्षी पावसाच्या खंडामुळे परभणी जिल्ह्यातील ९ तालुक्यांतील ४१ मंडलांतील सोयाबीनच्या यंदाच्या उत्पादनात मागील ७ वर्षांतील सरासरी उत्पादनाच्या तुलनेत ५० टक्के घट अपेक्षित आहे.

त्यामुळे पंतप्रधान पीकविमा योजनेअंतर्गत सोयाबीन पिकासाठी विमा संरक्षण घेतलेल्या शेतकऱ्यांच्या खात्यावर संभाव्य विमा भरपाईतून २५ टक्के अग्रिम रक्कम जमा करण्याचे आदेश जिल्हाधिकारी तथा पीकविमा योजना जिल्हास्तरीय संयुक्त समितीचे अध्यक्ष रघुनाथ गावडे यांनी शुक्रवारी (ता. ८) काढलेल्या अधिसूचनेद्वारे विमा कंपनीला दिले आहेत.

मध्य हंगाम प्रतिकूल परिस्थिती नुकसान भरपाई निश्‍चित करण्याच्या तरतुदीनुसार जिल्ह्यातील अधिसूचित विमा क्षेत्र (मंडळ) घटकातील सोयाबीन या अधिसूचित पिकाच्या प्रातिनिधिक सूचकांच्या आधारे राज्य शासनाचे अधिकारी, विमा कंपनी प्रतिनिधी यांनी पाहणी करून अहवाल सादर केला. सोयाबीनचे उत्पादन मागील ७ वर्षांच्या उत्पादनाच्या तुलनेत यंदाचे अपेक्षित उत्पादन ५० टक्क्यांपेक्षा कमी असल्याचे निदर्शनास आले आहे.

आयसीआयसीआय लोम्बार्ड जनरल इन्शुरन्स विमा कंपनीने ही अधिसूचना जाहीर झाल्यापासून १ महिन्याच्या आत सोयाबीनसाठी ४१ मंडलांतील शेतकऱ्यांच्या खात्यावर भरपाई रकमेच्या २५ टक्के अग्रिम रक्कम जमा करावी, असे आदेश गावडे यांनी दिले आहेत. या ४१ मंडलांतील विमाधारक शेतकरी हंगामाच्या पीक कापणी प्रयोगाद्वारे येणाऱ्या उत्पादनाच्या आधारे निश्‍चित होणाऱ्या नुकसान भरपाईसाठी पात्र राहतील.

नुकसान भरपाईची अग्रिम रक्कम अंतिम येणाऱ्या नुकसान भरपाईतून समायोजित करण्यात येईल, अशी माहिती कृषी विभागाच्या सूत्रांनी दिली. यापूर्वी सिंगणापूर, दैठणा (ता. परभणी), जिंतूर (ता. जिंतूर), सेलू (ता. सेलू), केकरजवळा (ता. मानवत), पाथरी, बाभळगाव (ता. पाथरी), रावराजूर, पेठशिवणी (ता. पालम), ताडकळस, लिमला (ता. पूर्णा) येथे अधिसूचना काढण्यात आली आहे.

सोयाबीन उत्पादकता स्थिती (प्रतिहेक्टरी क्विंटलमध्ये)

मंडल मागील ७ वर्षांतील सरासरी उत्पादन सर्वेक्षणानुसार अपेक्षित उत्पादन

परभणी शहर १३.१० ५.९०

परभणी ग्रामीण १३.१० ६.०३

पेडगाव १०.८२ ४.७६

जांब ११.३८ ५.००

झरी ११.८१ ५.२०

पिंगळी ११.०१ ४.९५

टाकळी कुंभकर्ण ११.२७ ४.९६

सावंगी म्हाळसा ९.३६ ४.२१

बामणी ९.४१ ४.१४

बोरी १०.१८ ४.६८

आडगाव १०.४४ ४.५९

चारठाणा ९.७२ ४.३७

वाघी धानोरा ९.७९ ४.२२

दूधगाव ९.७९ ४.३१

देऊळगाव गात १०.४७ ४.६०

वालूर १०.२८ ४.६२

कुपटा १०.२९ ४.५२

चिकलठाणा ९.६३ ४.३३

मोरेगाव १०.२४ ४.७१

मानवत १०.६३ ४.६८

कोल्हा ११.२३ ४.९४

रामपुरी १०.३३ ४.५४

ताडबोरगाव ११.५७ ५.०९

हादगाव १२.७५ ५.६१

कासापुरी १२.०९ ५.३२

सोनपेठ ८.३६ ३.७६

आवलगाव ८.३० ३.७३

शेळगाव ७.९९ ३.५९

वडगाव ८.२४ ३.७१

गंगाखेड ९.३६ ४.३०

महातपुरी ६.३१ २.९०

माखणी ८.६१ ३.७९

राणीसावरगाव ८.७८ ३.८६

पिंपळदरी ७.१३ ३.१३

पालम १०.७० ४.७०

चाटोरी १२.३२ ५.५४

बनवस ८.३६ ३.८४

पूर्णा १४.६३ ६.५८

कात्नेश्‍वर १२.१४ ५.४६

चुडावा १०.०९ ४.५४

कावलगाव ११.३७ ५.११