Nagar News : खरिपासाठी पंतप्रधान पीकविमा योजना राबवली जात आहे. नगर जिल्ह्यात यंदा गेल्या वर्षीपेक्षा अधिक शेतकरी सहभागी होत आहेत. अजून आठ दिवसांचा अवधी असल्याने जास्तीत जास्त शेतकऱ्यांनी सहभागी व्हावे, असे अवाहन जिल्हा अधीक्षक कृषी अधिकारी सुधाकर बोराळे यांनी पत्रकार परिषदेत केले.

नगर येथे जिल्हा अधीक्षक कृषी अधिकारी कार्यालयात झालेल्या पत्रकार परिषदेत बोलताना सुधाकर बोराळे म्हणाले, की नगर जिल्ह्यात खरिपाची पेरणी चांगली झाली आहे. अजूनही पेरा सुरू आहे.

यंदाही सरासरीपेक्षा अधिक पेरणी होईल असा कृषी विभागाचा अंदाज आहे. यंदा खरिपासाठी भात, बाजरी, भूईमूग, सोयाबीन, मूग, तूर, उडीद, कापूस, मका, कांदा या पिकांसाठी पंतप्रधान पीकविमा योजना राबवली जात आहे.

३१ जुलैपर्यंत पीकविमा भरण्याची तारिख आहे. २१ जुलैपर्यंत जिल्ह्यातील ४ लाख १ हजार १२४ शेतकऱ्यांनी पीकविमा भरला आहे. गेल्या वर्षी केवळ २ लाख २३ हजार २२६ शेतकरी सहभागी झाले होते. यंदा अजून विमा भरण्यासाठी आठ दिवसांचा अवधी आहे. त्यामुळे पाच लाखांपेक्षा अधिक शेतकरी यात सहभागी होतील यासाठी कृषी विभागाचे प्रयत्न सुरू आहेत.

कृषी विभागाचे अधिकारी, विमा प्रतिनिधी तसेच कृषी सहाय्यक गावगावांत जाऊन पीक विम्याबाबत माहिती देत आहे. आतापर्यंत नगर जिल्ह्यात २ लाख ३० हजार ७३ हेक्टरवर क्षेत्र पीकविम्यातून संरक्षित झाले आहे.

४६ हजार ९९६ हेक्टरवर कापसाचा विमा उतरवला असून १४ हजार ५०० हेक्टरवर बाजरीचा, तुरीचा २६ हजार हेक्टरवर, कांद्याचा ७ हजार ३१३ हेक्टर, सोयाबीनचा ६८ हजार ४०७ हेक्टर, मुगाची १६ हजार ७७० हेक्टरवर विमा उतरवला आहे.

आतापर्यंत विम्यापोटी १३५ कोटी १३ लाख रुपये शासन विमा कंपनीला भरणार आहे. ९६६ कोटी रुपये यामुळे संरक्षित झाले असल्याचे सुधाकर बोराळे म्हणाले.