मुंबई : वनक्षेत्रात रात्री शेतीला पाणी (Agriculture Electricity) देताना वन्य प्राण्यांचे होणारे हल्ले होत असल्याने चंद्रपूर, गडचिरोली आणि गोंदिया या जिल्ह्यांतील वनक्षेत्रात दिवसा वीज (Daytime Electricity For Agriculture ) देण्यात येणार आहे. या बाबतची मागणी वनमंत्री सुधीर मुनगंटीवार यांनी केली होती. त्यास ऊर्जामंत्री तथा उपमुख्यमंत्री देवेंद्र फडणवीस यांनी मान्यता दिल्याची माहिती मुनगंटीवार यांनी दिली आहे.

शेतीसाठी करण्यात येणारे भारनियमन रद्द करून सकाळी ६ ते संध्याकाळी ६ या वेळात कृषिपंपांना सलग वीजपुरवठा करण्‍यात येईल, अशी माहितीही मुनगंटीवार यांनी दिली आहे. या संदर्भात राज्‍याचे उपमुख्‍यमंत्री तथा ऊर्जामंत्री देवेंद्र फडणवीस यांच्‍याशी सुधीर मुनगंटीवार यांनी चर्चा केली. उपमुख्‍यमंत्री फडणवीस यांनी यासंबंधी तत्काळ सकारात्‍मक कार्यवाहीचे निर्देश ऊर्जा विभागाला दिले आहेत.

या जिल्ह्यांमध्ये दुपारच्‍या वेळी कृषिपंपांसाठी भारनियमन करण्‍यात येत असल्‍यामुळे रात्रीच्‍या वेळी शेतकरी संबंधित कामांसाठी शेतात जातात. अशा वेळी वन्‍यप्राण्‍यांच्‍या होणाऱ्या हल्‍ल्‍यात शेतकऱ्यांचे बळी जाण्‍याचा घटना जिल्‍ह्यात मोठ्या प्रमाणावर घडत आहेत. त्यामुळे सध्या रात्रीच्या वेळी शेतीची कामे करण्यास शेतकरी वर्ग धास्तावलेला आहे. या बाबत शेतकऱ्यांनी वनमंत्री मुनगंटीवार यांना भेटून दिवसा वीज देण्याची विनंती केली होती.