Red Alert in Odisha : बंगालच्या उपसागरातील कमी दाबाच्या क्षेत्राची तीव्रता वाढून त्याचे तीव्र कमी दाबाच्या क्षेत्रात रूपांतर झाल्याने ओडिशात जोरदार पावसाने हजेरी लावली. राजधानी भुवनेश्वरमध्ये ऑगस्ट महिन्यातील एका दिवसातील पावसाचा यापूर्वीचा विक्रम मोडला गेला. बुधवार (ता. २) दुपारपर्यंत समुद्र खवळलेला राहणार असल्याने मच्छीमारांना समुद्रात न जाण्याचा इशाराही हवामान खात्याने दिला आहे.

हवामान खात्याच्या निवेदनात म्हटले आहे, की बंगालच्या उपसागरातील कमी दाबाचे क्षेत्र प्रतितास २५ किमी वेगाने उत्तर-वायव्य दिशेने सरकले आहे. तीव्रता वाढून त्याचे तीव्र कमी दाबाच्या क्षेत्रात रूपांतर झाले आहे. सध्या हे क्षेत्र बांगलादेशातील खेपुपाराच्या पूर्वेस सुमारे १६० किमी आणि प. बंगालमधील दिघाच्या पूर्वेस ४२० किमी अंतरावर आहे.

त्याची तीव्रता वाढून ते आज संध्याकाळपर्यंत खेपुपाराचा किनारा ओलांडण्याची शक्यताही हवामान खात्याने वर्तविली. त्यापुढील २४ तासांत ते प.बंगालमध्ये पश्चिम-वायव्येकडे सरकण्याचीही शक्यता आहे. या कमी दाबाच्या क्षेत्राच्या प्रभावामुळे समुद्र खवळलेला राहणार असल्याची शक्यता आहे.

प. बंगाल व बांगलादेश किनाऱ्यानजीक वाऱ्याचा वेग प्रतितास ५५ कि.मी. राहण्याची शक्यता आहे. दरम्यान, कमी दाबाच्या क्षेत्रामुळे पावसाला अनुकूल हवामान असल्याने ओडिशात अनेक ठिकाणी जोरदार पावसाने हजेरी लावली.

आज सकाळी साडेआठपर्यंतच्या २४ तासांत राजधानी भुवनेश्वरमध्ये २५९ मिमी पावसाची नोंद झाली. हा भुवनेश्वरमध्ये ऑगस्टमध्ये पडलेला विक्रमी पाऊस असून यापूर्वी २० ऑगस्ट १९९७ रोजी २५४ मिमी पाऊस पडला होता.

चार जिल्ह्यांना ‘रेड अलर्ट’

हवामान खात्याने भुवनेश्वरमधील चार जिल्ह्यांना ‘रेड अलर्ट’ जारी केला आहे. त्याचप्रमाणे, इतर १३ जिल्ह्यांना ‘ऑरेंज' तर १० जिल्ह्यांना ‘यलो अलर्ट’ जारी केला आहे. अतिवृष्टीच्या शक्यतेने प्रशासन आपत्कालीन स्थितीचा सामना करण्यासाठी सज्ज झाले आहे.