सोलापूर : ‘‘जिल्हा परिषदेच्या ग्रामपंचायत (Grampanchayat) विभागाने ग्रामपंचायतीचे सक्षमीकरण करण्यासाठी सुरू केलेले अभियान महत्त्वपूर्ण आहे. यामुळे गावांचा सर्वांगीण विकास (Rural Development) होईल,’’ असे पालकमंत्री राधाकृष्ण विखे-पाटील (Radhakrushna Vikhe Patil) यांनी सांगितले.

जिल्ह्यात ग्रामपंचायत सक्षमीकरण अभियानाचा प्रारंभ आणि अभियान माहिती पुस्तकाचे अनावरणप्रसंगी पालकमंत्री श्री. विखे-पाटील बोलते होते. या वेळी आमदार सुभाष देशमुख, विजय देशमुख, रणजितसिंह मोहिते पाटील,

सचिन कल्याणशेट्टी, समाधान आवताडे, जिल्हाधिकारी मिलिंद शंभरकर, जिल्हा परिषदेचे मुख्य कार्यकारी अधिकारी दिलीप स्वामी, पोलिस अधीक्षक तेजस्वी सातपुते, उपमुख्य कार्यकारी अधिकारी चंचल पाटील, उपमुख्य कार्यकारी अधिकारी इशाधिन शेळकंदे आदी उपस्थित होते.

श्री. विखे-पाटील म्हणाले, ‘‘सीईओ दिलीप स्वामी यांची संकल्पना आदर्शवत असून यामध्ये सर्व ग्रामपंचायतींनी सहभागी व्हावे. दोन ऑक्टोबर ते १५ डिसेंबर २०२२ या कालावधीत अभियान सुरू राहणार आहे.

ग्रामपंचायतीमार्फत देण्यात येणाऱ्या सुविधा, ग्रामपंचायतीच्या योजना लोकाभिमुख करणे, ग्रामपंचायतीचे उत्पन्न वाढविणे, ग्रामसेवकांना प्रशिक्षण देणे, ग्रामस्थांना संगणकीकृत सेवा पुरविणे आदी उद्दिष्ट्ये अभियानाची आहेत,’’ असे सांगितले.