Palghar News : जव्हार तालुक्यातील शेतकऱ्यांना लहरी हवामान, ओला अगर कोरडा दुष्काळ, पूर किंवा अन्य नैसर्गिक आपत्ती उद्भवल्यास आधार म्हणून महसूल विभागाकडून पीक पाहणी हा राबवला जात आहे. यामुळे शेतकऱ्यांना नुकसानभरपाई किंवा अन्य शासकीय लाभाच्या योजना मिळवता येतील. शासन स्तरावर या उपक्रमाला आता १५ ऑक्टोबरपर्यंत तिसऱ्यांदा मुदतवाढ देण्यात आली आहे.

तालुक्यात ११,३२५ खातेदार असून त्यापैकी ५४९८ खातेदारांची पीक पाहणी पूर्ण झाली आहे, तर ५८२७ खातेदारांची पीक पाहणी प्रगतिपथावर आहे. इंटरनेट आणि काही ठिकाणी मोबाईलच उपलब्धता होत नसल्याने ही पीक पाहणी करताना अडथळा निर्माण होत आहे, यावर सरकारने मार्ग काढावा, अशी मागणी शेतकऱ्यांनी केली आहे.

शासनाच्या महसूल विभागाच्या ई-पीक पाहणी मोहीम सुरू असली तरी आदिवासी, गरीब शेतकऱ्यांकडे स्मार्ट मोबाईल नाहीत. त्यामुळे ई-पीक नोंदीसाठी शेतकऱ्यांना अडचणींचा सामना करावा लागत आहे. परिणामी शेतातील कामे सोडून ई- पीक नोंदी करून देण्याची विनंती स्मार्ट मोबाईलधारकांकडे करावी लागत आहे. त्यात अनेकदा इंटरनेटचा व्यत्यय येत असून विजेचा वारंवार खोळंबा होत आहे, परिणामी पीक पाहणी करताना समस्या येत असल्याची खंत शेतकरी व्यक्त करत आहेत.

नोंदणी आवश्यक

ई-पीक पाहणीद्वारे शेतात जाऊन शेतकऱ्यांना पिकांची माहिती भरावयाची आहे. तसे न केल्यास ७ / १२ कोरा राहील, असे सांगण्यात येते.

ई-पीक नोंदणी नसेल तर जागा पडीक आहे, असे समजले जाते त्यामुळे शेतकरी भरपाईपासून वंचित राहतो. तेव्हा ई-पीक नोंदणी करणे आवश्यक आहे.

शेतकऱ्यांच्या अडचणी

तलाठ्यांकडून गाव नमुन्यात पिकांची नोंद केली जात होती. सरकारने पीक नोंदीसाठी ई-पीक नोंदणी ॲप तयार केले आहे. ७/१२ खाते, उताऱ्यावर पीक नोंदी मोबाईल ॲपच्या माध्यमातून करावी लागत आहे.

गरीब,मजूर शेतकऱ्यांकडे स्मार्ट मोबाईल उपलब्ध नाहीत. बहुतांश शेतकरी अशिक्षित असल्याने मोबाईलचे पुरेसे ज्ञान नाही. ई-पीक ॲप कोठून डाऊनलोड करायचे, त्यात कोणती व पिकांची माहिती कशी भरायची, असा प्रश्न त्यांच्यापुढे आहे.