Nanded News नांदेड : गुंठेवारीचे (Gunthewari) बरेच प्रस्ताव दाखल करावयाचे शिल्लक आहेत. त्यामुळे ग्रामीण भागातील गुंठेवारीचे प्रस्ताव दाखल करण्यास आता ३१ मार्च २०२३ पर्यंत मुदतवाढ देण्यात आली आहे.

महाराष्ट्र गुंठेवारी विकास अधिनियम (नियमाधीन करणे, श्रेणीवाढ व नियंत्रण) अधिनियम २०२१ अंतर्गत महाराष्ट्र शासनाने ३१ डिसेंबर २०२० पूर्वीचे अनधिकृत भूखंड, अनधिकृत भूखंडावरील बांधकाम नियमाधिन करण्यास मान्यता दिली.

त्यानुसार नांदेड जिल्ह्यातील महानगरपालिका, नगरपालिका व नगरपंचायत हद्दीअंतर्गत क्षेत्र वगळून उर्वरित ग्रामीण भागातील ३१ डिसेंबर २०२० पूर्वी अस्तित्वात असलेले अनधिकृत भूखंड, अनधिकृत भूखंडावरील बांधकाम नियमाधिन करण्यासाठी नगररचना विभाग (शाखा कार्यालय नांदेड) यांच्याकडे नोंदणीकृत परवानाधारक आर्किटेक्ट, इंजिनिअर यांच्यामार्फत छाननी शुल्कासह प्रस्ताव दाखल करण्यास ३१ ऑक्टोंबर २०२२ पर्यंत मुदत देण्यात आली होती.

त्यास आता ३१ मार्च २०२३ पर्यंत मुदतवाढ देण्यात आली आहे, असे जिल्हाधिकारी कार्यालयातील प्राधिकृत अधिकाऱ्‍यांनी (गुंठेवारी कक्ष) कळविले आहे.