कोल्हापूर ः निवडणूक आयोगाने (Election Commisiion) राज्यातील सात हजार ७५० ग्रामपंचायतींच्या निवडणुकींचा (Gram Panchayat Election) कार्यक्रम जाहीर केला. यात कोल्हापूर जिल्ह्यातील ४७५ ग्रामपंचायतींचा समावेश आहे. निवडणुकीसाठी २८ नोव्हेंबरपासून अर्ज भरण्याची प्रक्रिया सुरू होईल; तर १८ डिसेंबरला मतदान आहे. मतमोजणी २० डिसेंबरला होईल.

कोरोनामुळे लांबलेल्या व सदस्यांची मुदत संपलेल्या ग्रामपंचायतींच्या निवडणुका यापूर्वीच झाल्या आहेत. तथापि, नोव्हेंबर, डिसेंबरअखेर जिल्ह्यासह राज्यातील बहुतांश ग्रामपंचायतींच्या विद्यमान सभागृहाची मुदत संपत आहे. अशा ग्रामपंचायतींवर प्रशासक नेमायचा की निवडणुका घ्यायच्या, याविषयी राज्य निवडणूक आयोगात चर्चा सुरू होती. अखेर या दोन महिन्यांत मुदत संपणाऱ्या सर्वच ग्रामपंचायतींचा निवडणूक कार्यक्रम जाहीर करण्यात आला. नोव्हेंबरमध्ये जिल्ह्यातील ४२९, तर डिसेंबरमध्ये ४५ ग्रामपंचायतींच्या विद्यमान सभागृहाचा कार्यकाळ संपत आहे.

४७५ ग्रामपंचायतींचा कार्यकाळ संपणार

जिल्ह्यातील ४७५ ग्रामपंचायतींचा कार्यकाळ या दोन महिन्यांत संपत आहे. त्यामुळे या ग्रामपंचायतींचाही कार्यक्रम जाहीर करण्यात आला. करवीर तालुक्यातील वडणगे, पाचगाव, उचगाव, कळंबा या मोठ्या ग्रामपंचायतींचा यात समावेश आहे.