Vitthal Mahapooja : आषाढी वारीनिमित्त मुख्यमंत्री एकनाथ शिंदे यांच्या हस्ते सपत्निक विठुरायाची शासकीय महापूजा संपन्न झाली. यंदा शासकीय महापूजेचा मान अहमदनगर जिल्ह्यातील भाऊसाहेब काळे व मंगल काळे यामानाच्या वारकरी दाम्पत्याच्या हस्ते प्रथेनुसार महापूजा करण्यात आली.

राज्याच्या कानाकोपऱ्यातून विविध संतांच्या पालख्या आणि लाखो वारकरी पंढरपूरात दाखल झाले. आषाढी एकादशीला होणारी शासकीय महापूजा मुख्यमंत्री एकनाथ शिंदे यांच्या हस्ते होणारी होती. त्यामुळे ते बुधवारी दुपारीच दाखल झाले होते. रात्री मंदिर समितीची पाद्यपूजा आणि नित्यपूजा झाल्यावर शासकीय महापूजेला सुरुवात झाली. विशेष म्हणजे आज पहिल्यांदा विठ्ठलाच्या मूर्तीला चंदनाचा लेप लावून अभिषेक घालण्यात आला. यानंतर मुख्यमंत्री एकनाथ शिंदे यांनी सपत्निक आणि भाऊसाहेब मोहिनीराज काळे व त्यांच्या पत्नी मंगल भाऊसाहेब काळे या मानाच्या वारकरी दाम्पत्याच्या हस्ते पूजा करण्यात आली. 

अहमदनगर जिल्ह्यातील नेवासा तालुक्यातील वाकडी येथील भाऊसाहेब मोहिनीराज काळे (वय ५६) व त्यांच्या पत्नी मंगल भाऊसाहेब काळे (वय ५२) यांना विठ्ठल-रूक्मिणीच्या महापूजेचा मान मिळाला आहे. आज एकादशीच्या दिवशी पांडुरंगाचे दर्शन व्हावे, यासाठी ते सकाळी ६ वाजल्यापासून रांगेत उभे राहिले होते. गेल्या ३० वर्षांपासून करोनाचा दोन वर्षांचा अपवाद वगळता न चुकता त्यांनी जोडीने वारी केली असल्याचे सांगण्यात आले.

बळीराजा कष्टकऱ्याला चांगले दिवस यावेत. राज्यातील बळीराजा सुखी समाधानी व्हावा. पाऊस पडू दे, प्रत्येक राज्यातल्या माणसाला चांगले दिवस यावेत हे साकडं मुख्यमंत्र्यांनी विठुरायाच्या चरणी घातली.

शासकिय महापूजेला खासदार श्रीकांत शिंदे, ग्रामविकास मंत्री गिरीश महाजन, कामगार मंत्री सुरेश खाडे, सोलापूरचे पालकमंत्री राधाकृष्ण विखे-पाटील, शालेय शिक्षण मंत्री दीपक केसरकर, आरोग्यमंत्री तानाजी सावंत, कृषिमंत्री दादा भुसे यांच्यासह जिल्ह्यातील खासदार, आमदार आणि अन्य लोकप्रतिनिधी उपस्थित होते.