Nagpur News : पूर्व विदर्भाला पुन्हा पावसाने झोडपले असून नागपूर शहर व परिसरात गेल्या २४ तासांत १६४ मिलिमीटर पावसाची नोंद करण्यात आली. नागपूर शहरातील अनेक सखल भागात पावसाचे पाणी साचल्याने नागरिकांच्या घरात पाणी शिरून मोठे नुकसान झाले.

गेल्या आठवड्यात यवतमाळ जिल्ह्यात अवघ्या २४ तासांत २०० मिलिमीटरपेक्षा अधिक पावसाची नोंद करण्यात आली होती. परिणामी अनेक नद्या, नाल्यांना पूर येत घरांची पडझड झाली. सोबतच पिकांचेही नुकसान झाले. अनेक शेतकऱ्यांची शेती खरडून गेल्याने या क्षेत्रात दुबार पिकाबाबत साशंकता व्यक्‍त केली जात आहे.

गुरुवारी (ता.२७) पुन्हा हवामान खात्याने पूर्व विदर्भातील काही जिल्ह्यांमध्ये ऑरेंज अलर्ट जाहीर केला होता. त्यानुसार बुधवार (ता.२६) मध्यरात्रीपासूनच नागपूर शहरात धो-धो पाऊस बरसला. परिणामी शहराच्या अनेक भागात पावसाच्या पाण्याचा निचरा न झाल्याने शहरी वस्त्यांमध्ये पाणी शिरले.

अनेक घरातील साहित्य पाण्याने भिजल्याने त्यांचे नुकसान झाले आहे. नागपूर परिसरात गेल्या २४ तासांत १६४ मिलिमीटर पावसाची नोंद करण्यात आली. वर्धा जिल्ह्यात ६७, चंद्रपूर ६४.२, ब्रह्मपुरी ५६, यवतमाळ ४६.२, गडचिरोली ३३, गोंदिया ४.४, अमरावती ३.४, अकोला १.२ मिलिमीटर याप्रमाणे २४ तासांत नोंद झाली आहे. यवतमाळ जिल्ह्याच्या महागाव तालुक्‍यात गुरुवारी मुसळधार पाऊस कोसळत होता. प्रशासनाकडून चंद्रपूर जिल्ह्यात शाळा, महाविद्यालयांना सुटी देण्यात आली होती.

वीज पडून ११ ठार

विदर्भात वीज पडून मृत्युमुखी पडणाऱ्यांच्या संख्येत सातत्याने वाढ नोंदविण्यात आली आहे. बुधवारी (ता.२६) चंद्रपूर जिल्ह्यात विविध घटनांमध्ये वीज पडून ८ ठार, तर ९ जखमी झाले. वर्धा, गोंदिया, गडचिरोली या जिल्ह्यांत देखील प्रत्येकी एक जण वीज पडून ठार झाला. त्यामुळे वीज पडून दगावणाऱ्यांची संख्या ११ झाली होती. वीज पडून तब्बल १४ व्यक्‍ती जखमी झाल्या आहेत.